Mańǵystaý oblysyndaǵy Ózen ken ornynan jan-jaqty barlaý barysynda jańa munaı shoǵyry tabyldy, dep habarlaıdy Almaty-akshamy.kz «Qazmunaıgaz» kompanıasynyń baspasóz qyzmetine silteme jasap.
Baspasóz qyzmetiniń málimetterine qaraǵanda, shyǵarylatyn munaı qorynyń ósimi 39,9 mln tonnany quraıdy.
«Kómirsýtek qorynyń ósimi «QazMunaıGaz» UK AQ ekonomıkalyq kórsetkishterine eleýli áser etedi. 2017 jyly «QazMunaıGaz» UK AQ, «Ózenmunaıgaz» AQ, «QMG Injınırıń» JSHS jáne «Aqtaý qalasyndaǵy QMG Injınırıń» fılıalynyń geologtar toby Ózen ken ornyn jete barlaýdyń egjeı-tegjeıli baǵdarlamasyna bastamashy boldy. Osy baǵdarlama sheńberinde 2017-2021 jyldary ishinde joǵary kórsetkishti seısmobarlaý 3D túsirilimi (368 sharshy km) júrgizildi, barlyq uńǵyma qoryna qaıta taldaý jasaldy (7500-den astam), geologıalyq tujyrymdamasy qaıta qaraldy jáne geologıalyq 3D-úlgisi qaıta qurastyryldy.
Júrgizilgen jumystardyń nátıjesinde ken ornynyń qurylymy naqtylandy jáne jańa munaı shoǵyry tabyldy. Atqarylǵan jumystardyń qorytyndysy boıynsha Ózen ken ornynyń munaı qory 8%- ǵa ulǵaıdy, bul óz kezeginde shyǵarylatyn qordyń 39,9 mln tonnasyn qurap otyr», - delingen habarlamada.
Qazaqstan Respýblıkasynyń paıdaly qazbalar qory jónindegi memlekettik komısıasy kómirsýtektiń naqtylanǵan kólemin 2021 jyldyń sońynda balansyna qabyldady.
Qazirgi ýaqytta jańa qordy esepke alý jáne olardy óndirýdi josparlaý maqsatynda ken oryndy ıgerý jobasyna túzetý engizilýde.