Ramazan aıynda Anglıanyń áıgili fýtbol klýby "Manchester Sıtı" musylman qaýymdastyǵyna aýyzashar berý dástúrin jalǵastyryp, "Etıhad" stadıonynda qasıetti aıda ıgi shara ótkizdi. Bul bastama klýbtyń áleýmettik jaýapkershiligi men túrli etnıkalyq jáne dinı toptar arasyndaǵy birlikti nyǵaıtýǵa baǵyttalǵan, dep habarlaıdy aqshamnews.kz
Qalalyqtar bul dástúrdi 4 jyl qatarynan jalǵastyrýda. Ár jyly aýyzasharǵa qatysýshylar sany artyp, bıyl 120 adam jınaldy. Sharaǵa klýb qyzmetkerleri, fýtbolshylar jáne jergilikti musylman qaýymdastyǵynyń ókilderi qatysty. Olar bir dastarhan basynda jınaqtalyp, Ramazan aıynyń qasıetin birge sezinip, tilekterin bildirdi.
"Manchester Sıtı" klýby bul is-shara arqyly óz jankúıerlerimen jáne qoǵammen baılanysty nyǵaıtyp, mádenı jáne dinı ártúrlilikti qurmettep keledi. Mundaı bastamalar tek sport áleminde ǵana emes, áleýmettik deńgeıde de mańyzdy ról atqaryp, adamdar arasyndaǵy yntymaqtastyqty arttyrady.