7 qyrkúıekte Belgıa quramasy 2026 jylǵy álem chempıonatynyń irikteýinde Qazaqstandy 6:0 esebimen oısyrata jeńdi. Bul sátsizdik ulttyq quramanyń bas bapkeri Álı Álıevtiń otstavkasymen jalǵasty. Bas bapker machtan keıingi baspasóz máslıhatynda óz erkimen qyzmetten ketetinin málimdedi. Bul jaıttardan ne kútemiz? Aqshamnews.kz tilshisi sport sarapshysynyń boljamyn bildi.
"Kúlli Eýropaǵa masqara boldyq"
Sport sarapshysy, jýrnalıs Aınat Qabıdýlla Qazaqstan fýtbolynyń búgingi jaǵdaıyna alańdap otyr. Onyń aıtýynsha, árbir irikteý kezeńi nemese joldastyq kezdesý jankúıerlerge qýanysh syılaýdyń ornyna masqaramen aıaqtalyp jatyr.
"Ádettegideı taǵy da jeńildik. Jeńilis qalypty jaǵdaı bolyp bara jatyr. Kúlli Eýropaǵa masqara boldyq. Quramynda kásibı fýtbolshysy joq Lıhtenshteın ulttyq quramasy da Belgıadan dál osyndaı eseppen utyldy. Demek, bizdiń deńgeıimiz álemdegi eń álsiz quramalarmen teń bolyp tur ma degen oı týady", – deıdi sarapshy.
Qandaı jaǵdaıda federasıa basshylyǵy túgel otstavkaǵa ketýi kerek?
Álı Álıevtiń ketýi alǵashqyda federasıa úshin "otandyq bapkerge múmkindik berip jatyrmyz" degen syltaýdy jasyrýǵa yńǵaıly bolǵany anyq. Alaıda Qabıdýllanyń aıtýynsha, bulaı jankúıerlerdi aldaýdyń jóni joq:
"Qazaq fýtbolynyń jankúıerleri oıynshyq emes. Elimizde ulttyq quramany baptaı alatyn deńgeıdegi bapkerdiń joq ekenin bári biledi. Eger kelesi bapker taǵy da Qazaqstannan nemese postkeńestik elderden bolsa, federasıa basshylyǵy túgelimen otstavkaǵa ketýi kerek" dedi ol.
Jankúıer mádenıeti: bizge ne jetispeıdi?
Sarapshy tarapynan qazaq fýtbolynyń jankúıerlerine qatysty da ótkir pikir aıtyldy. Ol Ýelske qarsy Astanada ótken keıingi machty mysalǵa keltirdi:
"Qandaı fýtbolshylar bolsa, sondaı jankúıerler. Sońǵy óz alańymyzda Ýelske qarsy ótken machta vallııler quddy bir óz alańynda oınap jatqandaı áser qaldyrdy. Qyp-qyzyl jeıde, rýhty urandar Ýels jankúıerleriniń aýyzbirshiligin kórsetti. Qazaq fýtbolynyń jankúıerleri qashan osyndaı deńgeıge jetedi eken? Syrt alańdaǵy emes óz alańymyzdaǵy oıyndarǵa sary-kók túste, shapan, taqıamen kelýge qashan aýyzbirshiligimiz jetedi eken? Eń ońaı degen "Atameken" ániniń sózin qashan jańylmaı aıtamyz?" degen suraqtarmen qaıtqan edik sol machtan" dedi Aınat Qabıdýlla.
Eske salaıyq, Qazaqstan ulttyq quramasynyń bas bapkeri Belgıadan jeńilgen soń otstavkaǵa ketetinin málimdegen edi. Artynsha Qazaqstan fýtbol federasıasynyń prezıdenti Marat Omarov onyń ketýine qatysty pikir bildirdi.
"Jalpy ol komandany jasartý jaǵynan óz mindetin oryndady. Quramanyń orta jasy – 25-26. Biraq nátıjeler áli de kóńil kónshitpeıdi. Sondyqtan ol kelgen soń kadrlyq sheshimder qabyldaımyz. Men sheshimdi ol kelgennen keıin qabyldaımyn. Áli de sóılesemiz", – dedi Omarov Úkimet kýlýarynda.