Sháken Aımanov atyndaǵy "Qazaqfılm" ulttyq kınostýdıasynyń ıeliginde bolǵan "Kóshpendiler qalasy" dekorasıalyq kesheni syıǵa tartý sharty negizinde resmı túrde Qonaev qalasynyń menshigine berildi, dep habarlaıdy aqshamnews.kz
Qonaev qalasy ákimdiginiń baspasóz qyzmeti habarlaǵandaı, "Kóshpendiler qalasynyń" aýmaǵy İle ózeniniń sol jaǵalaýynda ornalasqan, aýmaǵy 5,8 gektar. Nysannyń balanstyq quny – 15,4 mln teńge. Alaıda jyldar boıǵy paıdalaný barysynda keshen aıtarlyqtaı tozyp ketken: keıbir qurylystary jaramsyz bolyp, bastapqy kelbetiniń birqatar elementteri joıylǵan.
"Qalalyq memlekettik aktıvter jáne satyp alýlar bólimi usynǵan aqparatqa sáıkes, endi bul nysan turǵyn úı-kommýnaldyq sharýashylyq bólimine bekitildi. Josparda – týrısik baǵytty damytý, keshendi qalanyń vızıttik kartochkasyna aınaldyrý bar. Onyń kútimi men aǵymdaǵy jóndeýi úshin búdjetten qarjy bólinedi", – dedi Qonaev qalasy ákimdigi.
Ákimdiktegilerdiń aıtýynsha, ınfraqurylymdy damytý jumystary bastalyp ketken. "Kóshpendiler qalasyna" deıin uzyndyǵy shamamen 7 shaqyrym bolatyn jańa jol salynyp jatyr. Sonymen qatar joba aıasynda elektr berý jelisin tartý, jol boıyn jaryqtandyrý jáne avtoturaq uıymdastyrý kózdelgen. Joldyń eni – 7 metr, eki jolaqty bolady. Qurylys jumystaryna 41 maman men 24 tehnıka tartylǵan. Jol qurylysy jyl sońyna deıin aıaqtalady dep josparlanýda.