Áserli kez...
Halymyz «El ishi – óner kenishi» dep tekke aıtpaǵan. Osy kúnderi qasterli sózdiń qudiretin birtindep uǵynýdamyz. Úlken shaharlar kim-kimdi de tańdandyrary anyq. Al Almatynyń ásemdigine, sulýlyǵyna sóz jetpeıdi. Shetinen keremet, shetinen ǵajap ǵımarattar. Ótken joly Ulttyq ǵylym akademıasyn syrttaı kórip, bir tamsandym. Aýylda júrip, radıo, teledıdardan estip, gazetten oqyǵanym bolmasa, kórmegenmin. Talaı elge belgili ǵalymdardy daıyndaǵan ustahana ekenin estigenmin. Sol kezde ishteı bir joly kelermin dep, kóńilime túıip qoıǵan edim.
Sonyń sáti tústi. Jýyrda jol túsip baryp qaıttym. Sondaı tamasha. İshi kitapqa toly. Akademıa ǵımaratynda ornalasqan Ádebıet jáne óner ınstıtýtynda boldym. Ekinshi qabatta ornalasqan eken.
Qabyrǵadaǵy maıly boıaýmen salynǵan sýretterge nazarym tústi. Qazaqı naqyshta, jap-jaqsy úılesim tapqan. Sonymen birge kitap sóreleri, ártúrli ádebı ǵylymı eńbekter - bári-bári jarasymdy.
Arasynda sary-qońyr túspen berilgen aǵash nazarǵa ilindi. Ony qutty ómir daraǵy «báıterek» dersiz. Qysqasy, osylaısha ózime kórme uıymdastyrdym. Birqataryn foto-arhıv retinde sýretke túsirip aldym.
Menińshe, kórme zaldaryn jıi aralap turǵan jón sekildi. Sonda adamnyń paıym-parasaty kemeldenip, ómirge degen talpynysy kúsheıedi degen oıdamyn.