Kúnnen qýat alatyn drondar jeńil ári uzaq usha alady
Ońtústik Koreıada 4 jarym myńnan astam dron qyzmette júr. Bul drondar adamdardy qutqarady, qylmyskerdi ustaıdy, tamaq ta jetkizip beredi. Áıteýir jumystyń qaı túrine de erinbeıdi, dep habarlaıdy Almaty-akshamy.kz «Habar 24» telearnasyna silteme jasap.
Elde 4 jyl ishinde dron naryǵy 7 ese ósken eken. Mundaı derek Seýldegi mamandandyrylǵan kórmede aıtyldy.
Koreıada jyl saıyn ushqyshsyz ushatyn apparattyń júzdegen jańa úlgisi paıda bolady. Al úkimettiń basty maqsaty atmosferaǵa shyǵatyn zıandy qaldyqtardy azaıtý bolǵandyqtan balamaly energıa kózderimen jumys isteıtin drondar jasala bastady. Bul qurylǵy kún arqyly zarádtalady. Ol 56 jarym saǵattan astam ýaqyt toqtamaı ushyp, koreı rekordyn jańartty.
«Kúnnen qýat alatyn drondar jeńil jáne uzaq usha alady. Kúndiz batareıalar kúnnen qýat alady, túnde osy energıamen ushady. Basqa kólikter akýmýlátordy zarádtaý úshin jerge túsýi kerek, al bizdiki aspanda uzaq turady. Sondyqtan ol tabıǵı apattardy, orman órtterin baqylaý jáne aqparat jınaý úshin qoldanylady»,-deıdi zertteýshi Chon Dje Pek.
Ushqyshsyz apparattyń taǵy bir jańa qýat kózi sýtegi. Janarmaı bagy platına qosylǵan materıaldan jasalǵan, sondyqtan ol oq ótkizbeıdi. Bul ony jarylýdan qorǵaıdy. Biraq soǵan qaramastan mundaı ushqyshsyz ushaq áskerı emes, azamattyq maqsatta jasalǵan.
«Búgingi kúnge deıin drondy alys qashyqtyqqa jiberý múmkin bolmady. Mysaly, baqylaýshy ushqyshsyz apparat zarádtaý úshin birneshe ret qaıtyp oralýǵa májbúr boldy. Sýtegi apparaty bir ushqanda óz mindetin oryndaı alady. Mysaly, ol uzaq qashyqtyqtaǵy nysanǵa jetkizý, aýylsharýashylyq jumystar, tipti dezınfeksıalaýdy da atqara alady. Onyń arnaıy mehanızmi bar»,-deıdi kompanıanyń bólim bastyǵy Choı Ho Djın.
Drondy basqarýdy úıretýge arnalǵan arnaıy kompúterlik baǵdarlamalar bar. Kórmege kelýshiler de ózderin ushqysh retinde synap kórdi.