Memlekettik ındýstrıa jáne qurylys mınıstrligi sý jabdyqtaý men sý burý qyzmetteriniń kólemin esepteý ádistemesin ózgertetin buıryqqa qol qoıdy. Vedomstvonyń málimdeýinshe, jańa ádisteme qazaqstandyqtarǵa esh qolaısyzdyq týdyrmaıdy, dep habarlaıdy Aqshamnews.kz tilshisi Tengrinews.kz-ke silteme jasap.
Jańa ereje 1 qarashadan bastap kúshine enedi. Mınıstrlik azamattar arasynda týyndaǵan "kórshiler úshin jalpy eseptegish boıynsha tóleımiz be?" degen kúmándi suraqtarǵa túsinikteme berdi.
"Bul qaýipter orynsyz. Qabyldanǵan ádisteme jańa tólem túrlerin engizbeıdi jáne tólem mólsherin ulǵaıtpaıdy", — delingen vedomstvo habarlamasynda.
Mınıstrliktiń túsindirýinshe, qujattyń maqsaty - sý arnalarymen beriletin jáne burylatyn sý kólemin anyqtaýdyń biryńǵaı qaǵıdalaryn bekitý. Burynǵydaı tólem tutynýshy jelisi men sý arnasy jelisiniń jaýapkershilik shekarasynda ornatylǵan eseptegish quraldarynyń kórsetkishi boıynsha esepteledi. Eseptegish joq jerde jergilikti atqarýshy organdar (ákimdikter) bekitken tutyný normalary qoldanylady.
Kóppáterli úıler úshin de tártip ózgermeıdi: eger úıde jalpyúılik eseptegish bolsa, al keıbir páterlerde jeke eseptegishter ornatylmaǵan jaǵdaıda, jalpyúılik jáne jeke eseptegishter arasyndaǵy aıyrma kondomınıým qatysýshylary arasynda proporsıonaldy bólinedi. Mundaı tártip buǵan deıin de qoldanylyp kelgen, endi ol túsinbeýshilikti boldyrmaý úshin jańartylǵan ádistemede naqty bekitildi.
Komıtet tóraǵasynyń orynbasary Nursultan Keremkulovtyń aıtýynsha, qujattyń basty maqsaty - júıeni aıqyn etý:
"Ádisteme tólem qaǵıdasyn ózgertpeıdi. Eseptegish bar jerde adam tek óz tutynǵan sýy úshin tóleıdi, eseptegish joq jerde bekitilgen norma boıynsha. Jalpyúılik pen jeke eseptegish arasyndaǵy aıyrma bul úıdiń ortaq qajettilikteri, bireýdiń qateligi ne aıyppuly emes. Eshqandaı jasyryn esepteýler bolmaıdy. Mundaı aıyrmany bólý tártibi burynnan bar", - dedi ol.
Osylaısha, ádisteme páter ıeleri úshin eshteńeni ózgertpeıdi: tek qoldanystaǵy tájirıbeni zańdyq turǵyda naqtylap, eldiń barlyq óńiri úshin biryńǵaı ári túsinikti etedi. Vedomstvo sýǵa tólem óspeıtinin taǵy da rastady.