Almaty qalasynyń Óńirlik komýnıkasıalar qyzmeti uıymdastyrǵan pres-týr aıasynda jýrnalıser men blogerler Almaty haıýanattar baǵynyń jańartylǵan kelbetimen jáne onyń damý baǵyttarymen tanysty.
Bıyl baq ujymy janýarlardy kóbeıtý isinde aıtarlyqtaı jetistikterge jetken. Veterınar dáriger Iýlıa Dýdkınanyń aıtýynsha, 31 túrli janýardan 87 tól alynǵan. Olardyń arasynda amýr jolbarystary, aq qasqyrlar, kengýrý, lemýrlar, buǵylar men taýtekeler bar.
«Eń úlken qýanyshymyz – amýr jolbarystary jubynan eki jolbarys kúshikteriniń dúnıege kelýi. Bul nátıjege jetý úshin tórt jyl boıy júıeli túrde jumys istedik. Sonymen qatar, bıyl eki jup aq qasqyr tóldedi – birinen úsh, ekinshisinen bir bóltirik týdy. Bul – Qazaqstan úshin sırek kezdesetin, erekshe qundy túrler», – deıdi maman.
Baq ákimshiligi aldaǵy ýaqytta koleksıany jańa ekzotıkalyq janýarlarmen tolyqtyrýdy josparlap otyr. Jaqyn arada AQSH-tan tamandýa men altyjolaqty kireýkeı, Kanadadan sileýsinder jetkizilmek. Óz kezeginde Almaty haıýanattar baǵy sátti kóbeıip jatqan aqquıryq búrkitterdi sheteldik áriptesterine tabystaıdy.
Koleksıa jetekshisi Aıman Edgebaevanyń aıtýynsha, haıýanattar baǵynyń basty maqsaty – janýarlardy kórsetý ǵana emes, tabıǵatty qorǵaý jáne jastar arasynda ekologıalyq mádenıetti qalyptastyrý.
«Almaty haıýanattar baǵy jyrtqysh qustardy – saqaltaı, aq ıyqty jáne aq basty búrkitterdi, quzǵyndar men grıfterdi kóbeıtý isinde halyqaralyq deńgeıde tanymal. Amerıkalyq Timbavati Wildlife Park uıymy bizdiń baqta kýmaılardyń tabıǵı jolmen kóbeıip jatqanyn erekshe atap ótti. Bul – búkil álemdegi sırek jaǵdaı jáne Almaty úshin úlken mártebe», – dedi Edgebaeva.
Qazir haıýanattar baǵyna jańa turǵyndar – týkandar, sıvetter men gıbondar kelip qosylǵan. Ekzotarıým da jańa túrlermen tolyqpaq – munda varandar, ıgýanalar men sırek kezdesetin jylandar ákelinbek.
Sondaı-aq, aq aıý - Pýrgaǵa arnalǵan volerdiń jańǵyrtý jumystary aıaqtalýǵa jaqyn. Aldaǵy ýaqytta oǵan halyqaralyq baǵdarlama aıasynda jup tańdalady. Bolashaqta barlyq volerler janýarlardyń tabıǵı mekendeý ortasyna barynsha uqsas jaǵdaı jasaý úshin qaıta jabdyqtalady.
Búginde Almaty haıýanattar baǵy – eldegi tabıǵatty qorǵaý men bıoalýantúrlilikti saqtaý isindegi jetekshi ortalyqtardyń biri. Koleksıany keńeıtý, ınfraqurylymdy jańartý jáne sheteldik zooparktermen áriptestikti nyǵaıtý baǵytyndaǵy jumys turaqty jalǵasýda.