Almaty qalasy jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov óńirlik komýnıkasıalar qyzmetinde ótken baspasóz jıynynda ınklúzıvti qalalyq ortany damytý jáne múmkindigi shekteýli azamattardyń erkin qozǵalysyn qamtamasyz etý sharalary týraly aıtty.
Bıyl ınvataksı qyzmetin paıdalana alatyn azamattar tizimi keńeıdi. Endi bul qyzmetti tek tirek-qımyl apparaty buzylǵan adamdar ǵana emes, sondaı-aq ózin-ózi kútý men minez-qulqyn baqylaý qabileti shekteýli aýyr psıhıkalyq aýytqýy bar azamattar da paıdalana alady.
Jańa sanattardy qamtý úshin jergilikti búdjetten qosymsha 83 mıllıon teńge bólindi. Bul óz kezeginde qyzmet kórsetiletin adamdar sanyn arttyrýǵa múmkindik beredi.
«Invataksı qyzmetin keńeıtý – ár turǵyn óz ornyn qoǵamnan taba alatyn, naǵyz ınklúzıvti qala qurý jolyndaǵy mańyzdy qadam», - dedi Baýyrjan Jaýbasov.
Sondaı-aq ol jaıaý júrginshiler ótkelderindegi lıftiler men kótergishterdiń qoljetimdiligine de kóńil bólinip jatqanyn atap ótti. Qazir Almatydaǵy 126 ótkeldiń 57-sinde osyndaı qurylǵylar ornatylǵan. Azamattar olarǵa jeke kilt arqyly qol jetkize alady, ony aýdan ákimdikteri ótinish negizinde beredi.
2025 jyly Áýezov aýdanynda pılottyq túrde “Ońaı” júıesi engizildi. Ol kótergishter men lıftilerge jeke karta arqyly tegin qol jetkizýge múmkindik beredi. Karta ıesiniń mártebesin avtomatty túrde anyqtap, paıdalaný quqyǵyn rastaý júıesin qamtamasyz etedi.
«Bul júıe prosesti barynsha jeńildetedi. “Ońaı” kartasyn termınalǵa tıgizý jetkilikti, kótergish avtomatty túrde iske qosylady», - dedi Baýyrjan Jaýbasov.
Pılottyq joba oń nátıje kórsetse, 2026 jyly “Ońaı” júıesin qala boıynsha keńeıtý josparlanýda. Bul múmkindigi shekteýli azamattar úshin qalalyq ınfraqurylymnyń qoljetimdiligin aıtarlyqtaı arttyrady.