Májilis depýtattary Senat engizgen túzetýlermen kelisip, jasandy ıntellekt (JI) týraly zań men oǵan qatysty birqatar zańdarǵa ózgerister engizýdi qoldady, dep habarlaıdy Aqshamnews.kz.
Zańǵa qandaı ózgerister engizildi?
Ótken aptada Senat bul zań jobasyn Májiliske keri qaıtaryp, birqatar tolyqtyrýlardy talap etken bolatyn. Atap aıtqanda:
-
Jasandy ıntellekt júıelerin paıdalanýdan keletin zıan úshin mindetti saqtandyrý engiziledi. Buǵan deıin saqtandyrý erikti túrde ǵana qarastyrylǵan edi;
-
JI júıeleriniń ıeleri táýekel baıqalǵan jaǵdaıda tek zalaldy azaıtýǵa emes, ony aldyn alýǵa jáne múmkin bolatyn qaýipterdiń aldyn tolyqtaı joıýǵa mindetteledi.
Májilis túzetýlerdi maquldady
Búgingi plenarlyq otyrysta Májilistiń Ekonomıkalyq reforma jáne óńirlik damý komıteti Senattyń usynystarymen kelisti. Depýtattar daýys berip, zań túpkilikti qabyldandy. Endi qujat Memleket basshysynyń qol qoıýyna jiberiledi.
Halyqaralyq tájirıbe
Qazirgi ýaqytta álemniń birqatar elderi jasandy ıntellektti zańnamalyq turǵyda retteýge kirisken:
-
Eýropalyq odaq – joǵary táýekeldi júıelerge qatań talaptar men aıyppuldardy kózdeıtin keshendi zań qabyldaǵan alǵashqy óńirlerdiń biri. Ol kezeń-kezeńimen bıyl jáne kelesi jyly kúshine enedi;
-
Ońtústik Koreıa – ramalyq zań qabyldady;
-
Qytaı, AQSH, Ulybrıtanıa jáne BAÁ – jasandy ıntellekt salasyn retteıtin jeke normatıvtik aktiler qoldanysta;
-
Japonıa, Brazılıa jáne Úndistan – zań jobalary ázirlený ústinde.
Jańa zań Qazaqstanda jasandy ıntellektti damytýǵa quqyqtyq negiz qalyptastyryp qana qoımaı, ony qaýipsiz ári jaýapty paıdalanýǵa baǵyttalǵan.