Almatylyq onkologtar elde alǵash bolyp hımıopreparattardy daıyndaýǵa arnalǵan KiroOncology robottandyrylǵan júıesin engizdi.
Almaty Qazaqstandaǵy tehnologıalyq medısınanyń flagmanyna aınalyp keledi. Elde alǵash ret Almatylyq onkologıa ortalyǵynda hımıopreparattardy daıyndaýdyń robottandyrylǵan KiroOncology júıesi engizildi. Buǵan deıin atalǵan júıe tek Eýropa men AQSH klınıkalarynda paıdalanylǵan. Bul týraly Almaty qalasy Óńirlik komýnıkasıalar qyzmetinde ótken baspasóz máslıhatynda Almaty qalasy ákiminiń orynbasary Nurlan Ábdirahym málimdedi.
Onyń aıtýynsha, sondaı-aq Qazaqstanda alǵash ret №3 qalalyq emhanada tirkeýshi qyzmetin atqaratyn jasandy ıntellekt negizindegi daýys robottary iske qosyldy. Júıe pasıenttiń sózin estip, túsinedi, keńes beredi jáne ótinishti retteıdi. Aldaǵy ýaqytta bul tájirıbe barlyq qalalyq emhanaǵa engiziledi.
«Almaty medısınany neǵurlym dál, qaýipsiz ári qoljetimdi etetin tehnologıalardy engizip keledi», — dedi Nurlan Ábdirahym.
Sonymen qatar, qalalyq kardıologıa ortalyǵy bazasynda alǵash ret qalalyq deńgeıde júrek transplantasıasy boıynsha ota jasalýǵa daıyndyq júrgizilip jatyr.
Kadrlyq áleýetke erekshe kóńil bólinýde. Almaty ákiminiń orynbasarynyń aıtýynsha, jyl saıyn qalanyń medısınalyq mekemelerine 400 jas maman jumysqa keledi, olar baspanamen jáne áleýmettik kepildiktermen qamtamasyz etiledi. Suranys joǵary baǵyttar boıynsha 124 dáriger rezıdentýraǵa jiberilgen.