Almaty qalasynyń Óńirlik komýnıkasıalar qyzmeti alańynda qala ákiminiń orynbasary Nurlan Ábdirahymnyń qatysýymen baspasóz konferensıasy ótti. İs-sharada az qamtylǵan jáne áleýmettik osal toptarǵa kórsetiletin áleýmettik qoldaý sharalary talqylandy.
Ómirlik qıyn jaǵdaıda qalǵan otbasylardy anyqtaý boıynsha keshendi jumys júrgizilýde. «Otbasynyń sıfrlyq kartasy» platformasy aıasynda 1 819 otbasy (ıaǵnı 9 063 adam) 755 mln teńge kóleminde ataýly áleýmettik kómek aldy.
Ákimniń orynbasarynyń aıtýynsha, qalanyń áleýmettik saıasaty tek qarjylaı qoldaýǵa ǵana emes, azamattardy eńbekke yntalandyrýǵa jáne óz otbasyn ózdiginen qamtamasyz etýge baǵyttalǵan.
«Bıyl múgedektigi bar 33 myńnan astam adam ońaltý quraldarymen jáne áleýmettik qyzmettermen qamtyldy. Bul maqsatqa 12,2 mlrd teńge bólindi. Sonymen qatar, 277 adamǵa quny 1,3 mlrd teńgeni quraıtyn ınovasıalyq tehnıkalyq quraldar berildi», - dedi Nurlan Ábdirahym.
2026 jyly Áleýmettik qorǵaý salasyn damytýdyń ulttyq ǵylymı ortalyǵymen birlesip, jeke ońaltý tehnıkalyq quraldaryn irikteý júıesin engizý josparlanýda. Bul júıe qyzmet alýshylardyń jeke erekshelikteri men medısınalyq kórsetkishterin eskerýge múmkindik beredi.
«Invataksı» qyzmeti de damyp keledi. Qarjylandyrý kóleminiń artýy nátıjesinde avtopark 145 kólikke deıin ulǵaıdy. «Iandeks Taksı» agregatory arqyly iske qosylǵan pılottyq joba paıdalanýshylar sanyn 2 myńnan 3,4 myń adamǵa deıin arttyrdy. 2026 jyldan bastap bul qyzmetti II jáne III dárejeli psıhıkalyq aýytqýy bar adamdar da paıdalana alady. Qyzmet sapasyn arttyrý maqsatynda ótinimder men baǵyttardy sıfrlyq túrde baqylaıtyn avtomattandyrylǵan dıspecherlik júıe engizilýde.