"Qaırat" klýbynyń ardageri Quralbek Ordabaev Dastan Sátpaevtyń ulttyq qurama oıynyna qatysa almaýyna baılanysty pikir bildirdi, - dep habarlaıdy Aqshamnews.kz tilshisi.
Ordabaevtyń aıtýynsha, shabýylshy sońǵy mach aldynda ózin jaısyz sezingenimen, komandaǵa kómektesý úshin bul týraly eshkimge aıtpaı, tolyq oıyndy ótkizgen jáne gol soqqan. Kezdesýden keıin aýyrsyný kúsheıip, medısınalyq tekserý jasaldy. Nátıjesinde sol jaq jambas bulshyqetinde shamamen tórt santımetrdeı isiný, sińir sozylýy jáne mıkrojaryqtar anyqtalǵan.
"Bul jas aǵza úshin aıtarlyqtaı júkteme, sondyqtan dárigerler oǵan klýb bazasynda qalyp, qalpyna kelý kýrsynan ótýdi usyndy. Klýb bul máseleni quramanyń medısınalyq shtabymen kelisip, jaǵdaı týraly resmı túrde habarlady. Ókinishke qaraı, bul joly Dastan ulttyq quramaǵa kómektese almaıdy", – dedi Ordabaev.
Dastan Sátpaev qazan aıyndaǵy álem chempıonaty irikteý oıyndaryn jiberip alady.
Eske salaıyq, 5 qazanda Premer-lıganyń 24-týr aıasyndaǵy "Jetisýǵa" qarsy machta tolyq 90 mınýt oınap, qarsylas qaqpasyna gol soqqan edi.