Almatynyń tórt koleji tehnıkalyq jáne kásiptik bilim berýdiń jańasha úlgisin usynyp, Quzyrettilik ortalyqtarynyń jumysymen tanystyrdy. Qazaqstan Prezıdentiniń bastamasymen jarıalanǵan Jumysshy mamandyqtar jyly aıasynda qala ákimdigi men Bilim basqarmasynyń qoldaýymen kolejder eńbek naryǵynda suranysqa ıe kásibı mamandardy daıarlaý tájirıbesin kórsetti.
Baspasóz týryn Óńirlik komýnıkasıalar qyzmeti men Bilim basqarmasy birlese uıymdastyrdy. Almaty kópsalaly koleji, Almaty energetıka jáne elektrondyq tehnologıalar koleji jáne Almaty qurylys-tehnıkalyq kolejiniń bazasynda WorldSkills chempıonatyna daıyndyq lagerleri jumys isteıdi. Munda elektromontaj, óndiristik avtomatıka, avtokólikti tehnıkalyq qyzmet kórsetý, IT, santehnıka jáne jylytý, qurǵaq qurylys, dánekerleý jáne jıhaz óndirisi boıynsha oqytý zamanaýı jabdyqtar men tájirıbeli tálimgerlerdiń basshylyǵymen ótedi.
Almaty kópsalaly kolejiniń dırektory Asylhan Beısetbaevtyń aıtýynsha, túlekterdiń 87%-dan astamy oqýdy aıaqtaǵan soń birden jumysqa ornalasady. Dýaldy oqytý aıasynda bul kórsetkish 100%-ǵa jetken. Mysaly, jıhaz óndirisi baǵyty boıynsha stýdentter birinshi kýrstan bastap óndiristik tájirıbeden ótip, keıin sol kásiporynǵa jumysqa ornalasady.
Almaty qurylys-tehnıkalyq kolejiniń bólim meńgerýshisi Baýyrjan Muhamedjanov stýdentterdiń halyqaralyq jarystardaǵy jetistikterin atap ótti. Jaqynda Polsha men Fransıada ótken baıqaýda qazaqstandyq stýdent júldeli oryn alyp, «Úzdik maman» medalónyn ıelengen. Bul — elimiz úshin buryn-sońdy bolmaǵan jetistik.