Almatydaǵy saýda-oıyn-saýyq ortalyqtarynyń biriniń turaq alańynda blogerdiń basynan osyndaı jaǵdaı ótken.
Áleýmettik jelilerde kólik urlaýdyń jańa sqemasy týraly aıtylǵan vıdeo keńinen tarap jatyr.
Bul sqemaǵa bloger tap bolǵan. Onyń aıtýynsha, alaıaqtar kóliktiń kiltinen shyǵatyn sıgnaldy buǵattaıdy, al júrgizýshi kúmándanbaı, avtokóligin qulyptandy dep oılap, ketip qalady. Arada birneshe mınýt ótkende kólik ishindegi zattar urlanýy nemese kóliktiń ózi joq bolýy múmkin. Mundaı jaǵdaı Almatydaǵy saýda-oıyn-saýyq ortalyqtarynyń biriniń turaq alańynda blogerdiń basynan ótken.
Kilt sıgnaly qalaı buǵattalady?
IT-maman Sergeı Demıdovtyń aıtýynsha, bul qurylǵy uıaly baılanysty óshirý úshin is-sharalar nemese emtıhandar kezinde qoldanylatyn qurylǵylarǵa uqsas.
"Djammer – bul shaǵyn qurylǵy, ol avtokólik kiltinen shyǵatyn radıosıgnaldy buǵattaıdy. Iaǵnı, júrgizýshi "Qulyptaý" batyrmasyn basady da kólik jabyldy dep oılaıdy, biraq sıgnal shyn máninde kólikke jetpeıdi", – dep túsindiredi sarapshy.
Urlyq qalaı jasalady?
Senarı qarapaıym:
júrgizýshi kólikti turaqqa qoıyp, "Qulyptaý" batyrmasyn basady;
sol sátte mańaıda qurylǵy qosýly turady, ol sıgnaldy buǵattaıdy;
kólik ashyq kúıinde qalady, al júrgizýshi muny teksermeı, ketip qalady;
qaskóı kólikke op-ońaı otyryp, ishindegi zattardy alyp ketedi nemese kólikti aıdap áketedi.
Qalaı qorǵanýǵa bolady?
İİM baspasóz qyzmeti málimetinshe, mundaı jaǵdaılardyń aldyn alý úshin mynadaı qosymsha sharalardy qabyldaý qajet:
elektrondyq jáne mehanıkalyq urlyqqa qarsy qurylǵylar men GPS-maıaktardy qamtıtyn zamanaýı qorǵaý keshenderin ornatý;
kólik ishinde qujattar men baǵaly zattardy qaldyrmaý.
Sarapshy sondaı-aq, tek brelokqa senip qoımaı, esikterdiń shynymen jabylǵanyn qolmen tekserýge keńes beredi.