Temirden túıin túıgen sheberler.
Túrkıada jer silkinisinen japa shekkenderge Qazaqstannan jiberilgen kıiz úılerdiń birazy Jetisý oblysynda jasaldy.Naqtyraq aıtqanda, Kóksý aýdanynyń Muqyry aýylynda ázirlendi. Ulttyq qundylyǵymyzdy qazirgi zamanǵa saı beıimdegen óndiris ornynda 30 adam jumys isteıdi, dep habarlaıdy Almaty-akshamy.kz 24.kz-ke silteme jasap.
Kıiz úı jasaýshylar kúnine úsh úı qurastyrady. Ýyǵyn ıip, keregesin dánekerlep, jabyndylaryn da tigedi. Kıiz úıdiń shańyraǵy men keregesin dánekerlep, ýyǵyn ıý - Azat Baǵdattyń mindeti. Temir ustasy kúnine bir úıdiń bólshekterin daıyndaıdy. Qurastyrylǵan mundaı baspananyń ózindik artyqshylyǵy bar, - deıdi sheber.
«Bul tórt buryshty trýba bolǵannan keıin jeńil bolady. Alyp jınaǵanǵa qolaıly. Tez tigiledi, tez quralady degen sekildi. Tez qaıtadan buza salýǵa bolady. Óte qolaıly», - deıdi dánekerleýshi Azat Baǵdat.
Sheberhanada kıiz úıdiń jabyndary da tigiledi. Oǵan kıizben qatar maqta jáne sý ótkizbeıtin brezent qoldanylady. Al oıý-órnekter arnaıy tapsyryspen mataǵa basylady.
«Shydamdylyǵy bylaı ondaǵan jyldarǵa jetedi. Bir qazaq úıge 150 metr mata ketedi. Jáne myna shekpennen 150 metr ketip qalady. Biz 8 metrlik, 10 metrlik úı tigip jatyrmyz», - deıdi sheberhana meńgerýshisi Joldyhan Zıaýtdınqyzy.
Óndiris orny jeti jyldan beri jumys isteıdi. Sheberler qolynan shyqqan 34 kıiz úı baýyrlas Túrkıaǵa jiberilgen.