Memleket basshysynyń tapsyrmalaryn oryndaý sheńberinde jeke tulǵalar kiristeri men múlkin mindetti deklarasıalaýdan bosatyldy.
Premer-mınıstr Oljas Bektenov qarjy mınıstriniń osy sanattaǵy jeke tulǵalardyń 90%-yn deklarasıalaýdan bosatý týraly usynysyn qoldady, dep habarlaıdy aqshamnews.kz.
Premer-mınıstrdiń tóraǵalyǵymen ótken Úkimet otyrysynda memleket basshysynyń Aýyl sharýashylyǵy qyzmetkerleriniń birinshi forýmynda bergen tapsyrmalary aıasynda jeke tulǵalardyń kiristeri men múlkin jalpyǵa birdeı deklarasıalaý máselesi qaraldy.
Qarjy mınıstri Mádı Takıev búginde alǵashqy úsh kezeńde jalpyǵa birdeı deklarasıalaý júıesine 4,8 mln adam, onyń ishinde memlekettik qyzmetshiler, komersıalyq uıymdar, kvazımemlekettik sektor basshylary men quryltaıshylary jáne olardyń jubaılary engenin habarlady.
Qalǵan sanattaǵy azamattardyń (jeke qurylymdar qyzmetkerleri, zeınetkerler, úı sharýasyndaǵy áıelder, stýdentter jáne basqa da tulǵalar) 8 mln-ǵa jýyq adamnyń deklarasıa tapsyrý mindetterine qatysty qarjy mınıstri derekter bazasyn sıfrlandyrýdy jáne qolma-qol aqshasyz tólemderdi damytýdy eskere otyryp, atalǵan sanattaǵy azamattardy aktıvteri men mindettemeleri týraly deklarasıalar tapsyrýdan bosatýdy usyndy.
Bosatý osy sanattaǵy jeke tulǵalardyń 90%-dan astamyna áser etedi. Deklarasıalaýdy kelesi sanattaǵy tulǵalar úshin saqtaý usynylady: QR tysqary jerlerde aktıvteri bar; bir jyl ishinde quny 20 myń AEK (74 mln teńge) astam somaǵa satyp alýlar jasaǵan; derbes salyq salynatyn tabys alǵan.
Azamattarǵa erikti túrde deklarasıalaý quqyǵy beriletinin atap ótken jón.
Premer-mınıstr Oljas Bektenov atalǵan usynysty qoldap, Qarjy, Ulttyq ekonomıka jáne Ádilet mınıstrlikterine úsh kún ishinde zańnamaǵa qajetti túzetýler daıyndaýdy jáne olardy Parlamenttiń qaraýyna engizýdi tapsyrdy.
Qazir deklarasıany 4 mln-nan astam adam tapsyrady. Olardyń arasynda memlekettik qyzmetshiler, kvazımemlekettik sektor men bıznes ókilderi bar. 2025 jyly barlyq qalǵan sanattaǵy azamattar deklarasıa tapsyrady dep josparlanǵan bolatyn. Buǵan halyq alańdaýshylyq bildirdi, sondyqtan atalǵan máselege memleket basshysy óziniń nazaryn aýdardy.
Búgingi tańda memlekettik organdardyń derekter bazasy barynsha sıfrlandyrylǵan. Qarjylyq jáne valútalyq baqylaý kúsheıtildi. Halyqaralyq kelisimder sheńberinde shottar boıynsha derekter almasý jolǵa qoıyldy. Sıfrlyq qyzmetter keń taralǵan. Sondyqtan jalpy alǵanda, jeke tulǵalardyń aktıvteri boıynsha barlyq aqparat bar.Qarjy, Sıfrlyq damý, ınovasıalar jáne aeroǵarysh ónerkásibi mınıstrlikteri tirkeý jáne salyqtyq baqylaý úshin barlyq sıfrlyq bazalardan, onyń ishinde ekinshi deńgeıli bankterden málimetter alýdy qamtamasyz etkeni jón. Sondyqtan men 2025 jyly azamattardyń qalǵan sanattaryn aktıvter týraly deklarasıalardy mindetti túrde tapsyrýdan bosatý týraly qarjy mınıstriniń usynysyn qoldaımyn, - dep atap ótti premer-mınıstr.