Aılaqtyń barlyq qurylǵylary jumys istep tur.
QR Premer-Mınıstri Álıhan Smaıylov pen «Kaspıı Qubyr Konsorsıýmy» AQ bas dırektory Nıkolaı Gorban qazaqstandyq munaıdy eksportqa tasymaldaý boıynsha yntymaqtastyq máselelerin talqylady, dep habarlaıdy Almaty-akshamy.kz Úkimettiń resmı saıtyna silteme jasap.
Kezdesý barysynda atalyp ótkendeı, qazirgi kezde munaı qubyrynyń ótkizý qabiletine qoıylǵan shekteýler alynyp tastaldy jáne qazaqstandyq júk jóneltýshilerden munaı qabyldaý tolyq kólemde qalpyna keltirildi. Aılaqtyń barlyq qurylǵylary jumys istep tur.
«KQK teńiz termınalynda zaqymdalǵan jyljymaly aılaq qurylǵylaryn jóndeý jumystary aıaqtalǵanyna qýanyshtymyz. Bul shekteýlerdi alyp tastaýǵa jáne Qazaqstanda munaı óndirýdi tolyq kólemde qalpyna keltirýge múmkindik berdi», - dedi QR Premer-Mınıstri.
Álıhan Smaıylov «Teńiz» ken ornyn keńeıtý jobasy aıaqtalǵannan keıin qosymsha munaı kólemin tasymaldaý úshin KQK qubyr júıesiniń osal jerlerin joıý jobasyn ýaqytyly iske asyrýdyń mańyzdylyǵyna toqtaldy.
«KQK munaı qubyryn odan ári apatsyz jáne úzdiksiz paıdalanýdy qamtamasyz etý asa mańyzdy. Bul úshin barlyq qajetti sharalardy qabyldaý kerek dep sanaımyn», - dedi Qazaqstan Úkimetiniń basshysy.
KQK munaı qubyry «Teńiz», «Qarashyǵanaq» jáne «Qashaǵan» iri ken oryndarynan munaı eksporttaýdyń eń tóte jolyn jáne neǵurlym tıimdi ekonomıkalyq jaǵdaılardy qamtamasyz etedi. 2021 jyly Qazaqstannan qubyr arqyly 53,1 mln tonna munaı, 2022 jylǵy qańtar-sáýir aılarynda 18,7 mln tonna munaı tasymaldandy.
