Almatyda kásipkerlerdi qoldaýǵa arnalǵan qandaı granttar bar ekeni aıtyldy, dep habarlaıdy Almaty-akshamy.kz BAQ.KZ-ke silteme jasap.
«Kásipkerlikti damytý jónindegi ulttyq joba» sheńberinde jyldyq 6% boıynsha eń joǵary somasy 3 mlrd. teńgege deıingi syıaqy mólsherlemesiniń bir bóligin sýbsıdıalaý múmkindigi kózdelgen. Ulttyq jobanyń óńirlik úılestirýshisi, ıaǵnı Almaty qalasynyń kásipkerlik jáne ınvestısıalar basqarmasy jyl saıyn ekonomıkanyń basym salalarynda shaǵyn kásipkerlik sýbektileri úshin óteýsiz negizde 5 mln. teńgege deıin memlekettik granttar berý boıynsha konkýrs ótkizedi, – dep anyqtama berdi Kásipkerlik jáne ınvestısıalar basqarmasy.
Sondaı-aq qalalyq basqarma dereginshe, kásipkerlerge kómek berý úshin Almaty qalasynyń ákimdigimen «Almaty Business – 2025» kásipkerlikti damytýdyń óńirlik baǵdarlamasy ázirlengen. Osy baǵdarlama sheńberinde «Almaty Finance» JSHS jáne «Almaty «MQU»» JSHS kompanıalary qurylyp, onda 500 mln teńgege deıingi somada jyldyq 2%, 6% jáne 12% jobalardy qarjylandyrýdyń saralanǵan tásili qoldanylady.
Almaty qalasynyń ákimdigi bastamasymen iske asyrylyp jatqan jobalarynyń qatarynda – «JANA BUSINESS» óńirlik baǵdarlamasy («Damý» kásipkerlik damytý Qorymen birlesken baǵdarlama) bar. Joba talaptary boıynsha sýbektiler úshin qaryz boıynsha syıaqynyń nomınaldy mólsherlemesi jyldyq 6%-dan aspaıdy jáne qaryzdyń eń joǵary somasy – 100 mln teńge.
Jalpy, 2022 jyly memlekettik jáne óńirlik baǵdarlamalar (Ulttyq joba, Qarapaıym zattar ekonomıkasy, AÓK, «Almaty bıznes – 2025», «Jańa bıznes») sheńberinde 48,1 mlrd teńge búdjet qarajaty bólindi. Jalpy somasy 131,5 mlrd teńgege 3 448 SHOB jobasy qarjylandyryldy, – dep habarlaıdy qalalyq basqarma.
Aıta ketken jón, Almaty qalasy Kásipkerlik jáne ınvestısıalar basqarmasy kásipkerlerge konsýltasıalyq qyzmet alý úshin kelesi mekenjaıǵa barýǵa keńes beredi: Kásipkerler tolyq konsýltasıalyq qyzmetti tegin «Qoldaý» kásipkerlik ortalyǵynan ala alady. Naqty meken-jaıy: Almaty qalasy, Baızaqov kóshesi, 303, 2 qabat.