Astanadaǵy QR Ulttyq akademıalyq kitaphanasynda Ermuhanbet Qýandyqtyń «ARNA-B» baspasynan shyqqan «1 jyl 11 aı 3 kún» atty derekti kitabynyń tanystyrylymy Jeltoqsan qurbandaryn únsiz eske alýmen ashyldy, dep habarlaıdy Almaty-akshamy.kz.
Tusaýkeserge qatysyp, tolǵamdy oı-pikir órbitken tanymal tulǵalar qatarynda qabyrǵaly qalamger, abaıtanýshy ǵalym, 1986-nyń Jeltoqsan kóterilisinen qýǵyn kórgen talaı bozdaqtardyń taǵdyryna arasha túsken eń alǵashqy qoǵamdyq uıym quramynda belsendi jumys jasaǵan qaıratker Tursyn Jurtbaı, «Egemen Qazaqstan» gazetiniń bas redaktory, alashtanýshy ádebıetshi-ǵalym, fılologıa ǵ.d., akademık Dıhan Qamzabekuly, L.N. Gýmılev atyndaǵy EUÝ Shyǵystaný kafedrasynyń profesory. t. ǵ. k., dosent Kúlash İlıasovalar biraýyzdan kitaptyń qundylyǵyn joǵary baǵalady. Olar avtordyń óz basynan ótkergen oqıǵalardy qarapaıym tilmen shynaıy beınelep jaza otyryp, jeltoqsan kóterilisi týraly tyń derekterdi naqty dáıektermen, ásirelemeı, dáleldi, nanymdy jetkize bilýin atap aıtty.
Kitapsúıer qaýym ókilderi qatarynda ardager jeltoqsanshylar da boldy. Avtor taǵdyrlas dostaryna, sondaı-aq, QR Ulttyq kitaphana dırektory Ǵazıza Qudaıbergenova men Memlekettik arhıvtiń bólim basshysy Ǵazıza Isahanǵa kitabyn óz qolymen tabystady. Óz kezeginde jeltoqsanshylar atynan «Jeltoqsan -86» respýblıkalyq keńesi tóraǵasy Qaıranbekov Baýyrjan men Almabaev Álibek avtorǵa jyly lebizderin bildirip, quttyqtaý hattary men estelik syılyqtaryn usyndy.
Jeltoqsan qurbandaryn eske alý kúni qarsańynda ótken bul sharada halyqaralyq «Shabyt» festıvali júldesiniń jáne «Altyn tobylǵy» ádebı syılyǵynyń ıegeri, aqyn Umtyl Zaryqqan Jeltoqsan týraly jyr-tolǵaýyn oqysa, E. Rahmadıev atyndaǵy akademıalyq fılarmonıanyń ónerpazdary Áıgerim Nartúıeeva, Zınat Qasymova, Qaısar Maılybaı tamyljyta oryndaǵan án-kúılerimen kesh áserin ústeı tústi.
Kópshilikke áýe tolqyny arqyly jaqsy tanymal radıojýrnalıs Muhtar Turtaıuly tanystyrylym tizginshisi qyzmetin erkin de tartymdy atqaryp otyrdy.
1986-nyń jeltoqsanynda qazaq tili men ult múddesin qorǵaý maqsatynda jastardy alańǵa shaqyrǵan úndeý paraqshalaryn jazyp taratqany jáne Almaty alańyndaǵy qandy qaqtyǵystarǵa qatysqandyǵy úshin sot úkimimen 5 jylǵa bas bostandyǵynan aırylyp, Karlagtyń qatań tártipti kolonıasyna aıdalǵan avtordyń yzǵarly Jeltoqsannyń ózi kýá bolyp, kózi kórgen, basynan keshken tarıhı oqıǵalaryn kóp jyldar boıy kókeıinde saqtaı júrip, san qaıtara jadynda jańǵyrtyp, úzik-úzik hatqa túsirip tolǵaı júrip, arada 35 jyl ótkende derekti-ómirbaıandyq tutas dúnıe etip jazyp shyǵýy — bir erlik! Al ol jazylǵandy eshkimge alaqan jaımaı, óz qarjysymen barlyq shartqa saı, tolymdy kitap etip jaryqqa shyǵarýy — Ermuhanbettiń ekinshi erligi boldy. Sonsha jyldyq tózim men qajyrly eńbek nátıjesinde týǵan tól týyndysyn taǵy da óz qarajat-kúshimen elimizdiń bas qalalarynan bastap, respýblıkadaǵy búkil oblystyq kitaphanalarǵa jetkizip, tegin tabystaýy — kezekti, azamattyq erligi dep baǵalanýǵa ábden-aq laıyq!
E.Qýandyq óziniń bul sheshimdi áreketterin respýblıka kitaphanalarynyń kitap qoryn «jas urpaqty basyna túsken qıyndyqpen kúrese biletin qaısarlyqqa baýlıtyn, olardyń ulttyq-patrıottyq sezimderi men rýhyn qaırap, asqaqtatatyn bir kitappen bolsa da baıytsam, es jıǵaly arman qylǵan azamattyq maqsatym — el táýelsizdigi tuǵyryn nyqtaýǵa mysqaldaı bolsa da qosqan jeke úlesim dep bilemin!..» dep túsindirdi.