«BAQ týraly» zańda jáne elimizdiń Eńbek kodeksinde jýrnalıserdiń mártebesi týraly bap joq.
Senat depýtaty Nurtóre Júsip osy másele boıynsha Premer-Mınıstrge saýal joldady, dep habarlaıdy Almaty-akshamy.kz
Jýrnalısiń qoǵamdaǵy orny zań júzinde anyqtalmaǵan. Salalyq zańda jýrnalıserdiń quqyqtary men mindetteri ǵana jazylǵan. Senatordyń aıtýynsha, munyń bári jýrnalıserdiń óte jaýapty jáne qaýipti jumysyn eskermeý.
«Elimizdegi BAQ týraly zańda jáne Eńbek kodeksinde jýrnalıserdiń mártebesi men kepildikteri týraly eshqandaı bap joq. Anyǵyraq aıtsaq, BAQ týraly zańnyń 20-babyndaǵy 10 quqyǵy men 21-babyndaǵy 5 mindeti ǵana jazylǵan. Eńbek kodeksinde mártebe jóninde bir aýyz sóz, tipti jýrnalıserdiń eńbek etý quqyqtary degen bólim de joq», – dedi Nurtóre Júsip.
Sondaı-aq aqparatqa qoljetimdilikti de jeke retteý qajet.
«Keıbir sheneýnikter tótenshe jaǵdaı kezderinde jýrnalıserdiń suraǵyna kásibı deńgeıde jaýap berýge daıyn bolmaı jatady. Kásibı qyzmetin atqaryp júrgen tilshige kedergi keltirý – halyqty memlekettik aqparat alý múmkindiginen aıyrý degen sóz. Kórshimiz Reseıdegi jaǵdaı múlde basqasha. Jýrnalıserdiń kásibı mindetine kedergi keltirgender, jýrnalıserge shabýyl jasaǵandar 6 jylǵa deıin túrmege qamalatyn arnaıy bap ta engizilgen», – dedi ol.
Sonymen qatar depýtat jýrnalıserge polıseılerge jasalǵandaı jaǵdaı nege jasalmaıtynyn surady.
Onyń aıtýynsha, pandemıadan 200-ge tarta jýrnalıs pen jazýshy ómirden ótti. AQSH-ta jýrnalıserdiń jalaqysy jylyna 28 myńnan 75 myń dollarǵa deıin jetedi. Al bizde bir jylda tabatyny 3-4 myń dollar shamasynda ǵana. Túrkıa, Ázerbaıjan sıaqty elderdiń de bizden kósh ilgeri.
«Qurmetti Asqar Uzaqbaıuly! Otandyq mass-medıa "Halyq únine qulaq asatyn memleket" tujyrymdamasynyń pármendi quraly bolýy tıis. Jýrnalıserge sot, prokýratýra, ishki ister, advokat, notarıýs sıaqty naqty mártebe beretin kez keldi. Aqparat salasyn damytýdyń 2021-2025 jyldarǵa arnalǵan Ulttyq josparyn jańadan jasaý qajet. BAQ-tyń yqpalynsyz qoǵamdy demokratıalandyrý múmkin emes. Sondyqtan jýrnalıserdi arnaıy áleýmettik mártebe arqyly qoldaýdy usynamyz. Ol úshin "Jýrnalıs mártebesi týraly" arnaıy zań qabyldaý qajet dep oılaımyn», – dedi Nurtóre Júsip.