18 jastaǵy qyz aýrýhanaǵa birneshe jaraqatpen túsken
Shymkenttegi jantúrshigerlik jol apatynan keıin avtobýs tıesili kompanıa lısenzıasynan aıyrylýy múmkin. Qalalyq polısıa departamenti ákimdikke osyndaı usynys joldady, dep habarlaıdy Almaty-akshamy.kz Almaty.tv-ge silteme jasap.
Birneshe adamnyń ómirin jalmaǵan jantúrshigerlik jol apatynan aman qalǵan Darıǵa Seıdalıeva qazir aýrýhanada. Anasy onyń 6 balanyń úlkeni, otbasynyń asyraýshysy ekenin aıtady. Qyzynyń ómirine alańdaıdy. Sózinshe, 2 kún ótse de, eshkim kelip keshirim surap, qyzdyń hal-jaǵdaıyn bilýge tyryspapty.
«Páteraqysy, túrli tólem, azyq-túlik bar – bári osy qyzdyń moınynda, otbasyn asyrap otyr. Mende bir-aq búırek bar, jumysqa jaramaımyn. Qazir 8 aılyq sábımen otyrmyn. Endi qyzym jaqyn arada jumysqa shyqpaıdy. Qalaı kún kóremiz? Avtobýs ıeleri jaýap bersin. Qyzymnyń emine qajetti dári-dármegi bar. Densaýlyǵy bir-eki jyldan keıin syr berse, kim jaýap beredi?» – dedi jábirlenýshiniń anasy Madına Seıdalıeva.
18 jastaǵy qyz aýrýhanaǵa birneshe jaraqatpen túsken. Aq halattylar oǵan otanyń qajet bolmaǵanyn aıtty. Degenmen ol áli birneshe kún aýrýhanada em qabyldap, dárigerdiń baqylaýynda bolady.
«8 sáýirde men aýrýhanada jaýapty dáriger boldym. Sol kúni oqıǵa ornynan Seıdalıeva Darıǵa deıtin 18 jasar qyz jetkizildi. Dereý jansaqtaý bólimine kirgizilip, tolyq tekserýden ótti. Tekserý barysynda bas mıynyń shaıqalýy, keýdesiniń aýyrsynyp qalǵany jáne qoly men aıaǵynda jaraqat anyqtaldy. Qazir naýqastyń jaǵdaıy ortasha deńgeıde, neırohırýrgıa bóliminde kerekti emin qabyldap jatyr», – dedi №1 qalalyq klınıkalyq aýrýhanasynyń bólim meńgerýshisi Eldar Smaǵulov.
Al jol-kólik apatynda qaza tapqandardyń úsheýi bir saýda ornynda satýshy bolyp istegen. Biriniń artynda shıetteı 5 balasy, endi biriniń múmkindigi shekteýli anasy qaraýsyz qaldy. Qaıtys bolǵandardyń jaqyndaryna kómek qolyn sozý úshin jumys ornynyń qyzmetkerleri arnaıy qor ashyp, qarjy jınap jatyr.
«Azıza degen ápkemiz satýshy bolyp isteıtin. Artynda 5 balasy qaldy. Osy qalada jaldamaly páterde turatyn, kúıeýi joq. Al ekinshi Azathan, Aızada dep aıtamyz. Ol qyzdyń múmkindigi shekteýli anasy bar, ol kisiniń jalǵyz asyraýshysy Aızada edi. Endi mamasy jalǵyz qaldy. Ol da jaldamaly páterde turatyn. Áriptestermen birigip, aqsha jınap jatyrmyz. Jınalǵan sýmmany osy marqumdardyń otbasyna bólip beremiz», – dedi Shymkent qalasynyń turǵyny Aıdana Rahymbaeva.
Bul is boıynsha qazir sotqa deıingi tergep-tekserý amaldary júrgizilip jatyr. Qalalyq polısıa departamenti ákimdikke tasymaldaýshy kompanıany lısenzıasynan aıyrý jóninde usynys joldapty.
«Saraptamalar taǵaıyndaldy. Avtobýs júrgizýshisi qamaýda. Shymkent qalalyq ákimshiligine Shymkent bus fırmasyn jolaýshylar tasymaldaý lısenzıasynan aıyrý týraly usynys joldandy. Usynysty biz joldaımyz, qaraý merzimi bir aı kóleminde», – dedi polısıa departamenti anyqtaý basqarmasynyń bastyǵy Nurdáýlet Súıeýbekov.
Qazir bul iske qatysty sot-medısınalyq saraptama taǵaıyndaldy. Qoǵamdyq kólik avtotehnıkalyq tekseristen ótip jatyr.