Memleket basshysy Qasym-Jomart Toqaev óziniń qyrkúıek aıyndaǵy Qazaqstan halqyna Joldaýynda 2025 jyldy «Jumysshy mamandyqtary jyly» dep jarıalaǵan edi. Bul bastamany sala ókilderi jumysshy mamandyǵynyń bedelin arttyryp qana qoımaı, tehnıkalyq jáne kásiptik bilim berý júıesiniń reformasynyń iske asýyna jasalyp otyrǵan qoldaý dep qabyldap otyr. Sátin salsa, osy jyly mártebeli mamandyq ıeleriniń mereıi kóterilip, san qyrly salanyń tamyryna qan júgiretin boldy.
– Kásiptik bilim berý salasyna reforma jasaý – aıryqsha ózekti másele. Bul – ekonomıkanyń ósimin qamtamasyz etý jáne ınvestısıalyq tartymdylyǵyn arttyrý úshin asa qajet qadam. Men 2025 jyldy «Jumysshy mamandyqtary jyly» dep jarıalap, osy ýaqyt ishinde tehnıkalyq jáne kásibı bilim berý júıesin reformalaý qajet ekenin tapsyramyn. Sondaı-aq, biz jumysshy mamandyqtaryn dáripteý arqyly qoǵamda eńbekqor jáne naǵyz maman bolý ıdeıasyn nasıhattaımyz, – degen edi el Prezıdenti. Qalamyzdaǵy baıyrǵy oqý oryndarynyń biri – «Almaty sán jáne qyzmet kórsetý salasy kolejinde» «Jumysshy mamandyqtar jylyna» oraı «Tigin óndirisi jáne kıimderdi úlgileý» mamandyǵy boıynsha 10 quzyrettilik ortalyǵy ashyldy.
– Bizdiń basty maqsatymyz – naryqta suranysqa ıe mamandardy daıarlaý. Sapaly maman daıarlaý úshin áleýmettik seriktester sheńberin keńeıtip, WorldSkills standarttary boıynsha mamandardy daıarlaý úshin materıaldyq- tehnıkalyq bazany jańartyp, ony tıimdi paıdalanyp, shyǵarmashylyq bastamany damytsaq deımiz, – deıdi kolej basshysynyń orynbasary Kúnimaı Omarova.
Bul kúnde atalmysh kolejdiń sheberhanalary men zerthanalary zamanaýı qurylǵylarmen tolyqtaı jabdyqtalǵan. Máselen, «Jas maman» jobasy aıasynda satyp alynǵan jabdyqtarmen óte sapaly ónimder shyǵarýǵa bolady. Sonyń bir dáleli, kolej tiginshileri tikken ónimder Máskeýdegi «Etno Erato» Eýrazıalyq baıqaýyna jáne Dýbaıda ótken «Emirates Fashion Week» sándik koleksıalar sherýine qatysty. Jaqynda kolej mamandary Italıada «Tigin óndirisi» baǵyty boıynsha halyqaralyq taǵylymdamadan ótip, biliktilikterin shyńdap qaıtty.