Býrabaıda joq úıdi jalǵa bergen 17 jastaǵy jasóspirim ustaldy, dep habarlaıdy Aqshamnews.kz tilshisi Polisia.kz-ke silteme jasap.
Qostanaı oblysy polısıa departamentiniń kıberqylmysqa qarsy kúres basqarmasy ınternet-alaıaqtyq jasady degen kúdikpen 17 jastaǵy jasóspirimdi ustady.
Tergeý derekterine sáıkes, ol Býrabaıda jalǵa beriletin úı týraly jalǵan habarlandyrýlar jarıalap, sengen azamattardan aldyn ala tólem alǵan. Mysaly, bir jábirlenýshi demalys úıin «brondaý» úshin 60 myń teńge aýdarǵan, biraq keıin kúdikti baılanysqa shyqpaı qoıǵan.
Jedel izdestirý sharasy kezinde tártip saqshylary jalǵan habarlandyrý jarıalaý úshin qoldanylǵan telefondy tárkiledi. Qazirgi ýaqytta alaıaqtyq deregi boıynsha sotqa deıingi tergeý júrip jatyr. Sonymen qatar polısıa kúdiktiniń ózge de uqsas quqyq buzýshylyqtarǵa qatysy bar-joǵyn tekserip jatyr.
Quqyq qorǵaý organdary azamattarǵa eskertý jasady: úıdi jalǵa almas buryn aqparattyń shynaıylyǵyn tekserip, aldyn ala tólem aýdarýǵa asyqpaý kerek. Sondaı-aq zańdy kúshke ıe jazbasha kelisimshart jasasqan qaýipsiz bolady.