Qazaqstannyń Energetıka mınıstrligi avtobýstarda jol aqy tarıfin qymbattatýdy usynǵan sarapshy Oljas Baıdildınovtyń pikirine baılanysty málimdeme jasady, - dep habarlaıdy Aqshamnews.kz tilshisi.
"Jolaqy 500 teńge bolýǵa tıis"
Sarapshy óz Telegram-arnasynda tasymaldaýshylarǵa beriletin memlekettik sýbsıdıalar týraly oı qozǵady.
"Astanada jáne Almatyda jolaqy 500 teńge bolýǵa tıis (máslıhat sesıalarynda buǵan deıin 450 teńge degen naqty emes baǵa atalǵan). Tek Almatynyń ózinde ótken jyly avtobýs tasymaldaryn sýbsıdıalaýǵa 200 mln dollar bólindi. Qyzmet sapasyn kórip otyrsyzdar ma? Bul salada naryqtyq baǵalar men ashyq báseke qajet. Paıdalanýshylar qashyqtyqqa baılanysty ártúrli baǵa tóleýge tıis. Naryqqa jat ári ashyq emes sýbsıdıalardy avtobýs parkterinen alyp, baǵalardy naryqqa jiberýdi usynamyn", – dep jazdy Baıdildınov.
Energetıka mınıstrligi ne deıdi?
Baıdildınovtyń jazbasy birqatar BAQ-ta tarap, jurttyń narazylyǵyn týdyrdy.
Ol keıbir aqparattarda Energetıka mınıstrligi janyndaǵy Qoǵamdyq keńestiń múshesi retinde kórsetilgen. Osyǵan baılanysty vedomstvo málimdeme jasady.
"Oljas Baıdildınov QR Energetıka mınıstrligi janyndaǵy Qoǵamdyq keńestiń múshesi emes. Onyń qoǵamdyq kólik qyzmetteri tarıfterin qalyptastyrý máseleleri boıynsha aıtqan pikirleri jeke kózqarasy jáne Qazaqstan Respýblıkasynyń memlekettik organdarynyń resmı ustanymyn bildirmeıdi", – dep málimdedi mınıstrlik.
Vedomstvo qoǵamdyq kólik qyzmetteri tarıfterin qalyptastyrýmen Energetıka mınıstrligi emes, ákimdikter aınalysatynyn eske saldy.
Oljas Baıdildınov týraly ne belgili?
Senat saıtyndaǵy málimet boıynsha, Baıdildınov - Almex Rolymer JSHS-niń bas dırektory.
2020 jyly qoǵam qaıratkeri Oljas Baıdildınov «Adaldyq Alańynyń» jobalyq keńsesiniń jetekshisi - QR Energetıka mınıstriniń shtattan tys keńesshisi bolyp taǵaıyndaldy.
Al Energetıka mınıstrliginiń málimetinshe, Oljas Baıdildınovtiń Energetıka mınıstrliginiń qurylymdarynda, «QazMunaıGaz» ulttyq kompanıasynda, bank salasynda tájirıbesi bar, munaı servısi salasynda óziniń bıznesin damytýmen aınalysqan, 2016 jyldan bastap Atameken Business telearnasynda «Baıdıldınov. Neft» salalyq avtorlyq baǵdarlamasyn júrgizedi, ár túrli buqaralyq aqparat quraldarynda qazaqstandyq munaı-gaz sektorynyń damýy týraly taldamalyq materıaldar jarıalaıdy.
Oljas Baıdildenov Instagram-daǵy paraqshasynda ózin Almeks Jobasynyń basshysy, Samuryq-Qazyna qoǵamdyq keńesiniń, Senat janyndaǵy sarapshylar klýbynyń, Básekelestikti qorǵaý jáne damytý agenttigi keńesiniń múshesi múshesi retinde tanystyrǵan. Qazir onyń ınstadaǵy paraqshasy jabyq tur.
Eske salaıyq, 2022 jylǵy Qańtar oqıǵasy kezinde Baıdildenov gaz baǵasyn ósirýdi talap etken edi. Qymbatshylyqqa narazylyq bildirgen halyqqa sarapshy avtobýspen júrýge keńes bergen.