Fransıanyń Nıssa qalasynda alǵash ret VinFast IRONMAN 2023 álem chempıonaty ótti.
Ardager sportshylar sanatynda sarapqa salynǵan altyn medaldi Qazaqstannyń aty ańyzǵa aınalǵan veloshabandozy ári Astana Qazaqstan Team klýbynyń bas menedjeri Aleksandr Vınokýrov jeńip aldy, dep habarlaıdy Almaty-akshamy.kz.
Egemen.kz aqparatyna súıensek, dúnıe júzi boıynsha ár-túrli jas sanatyndaǵy úzdik trıatlonshylar 140,6 mıldik kvestti baǵyndyrý úshin jınaldy.
«Ironman álem chempıonaty meniń úıime jaqyn jerde ótti, oǵan qatysýdan bas tarta almadym. Men múmkindiginshe daıyndaldym, jarystarǵa jáne basqa da is-saparlarǵa ýaqyt tabýǵa tyrystym. Tańerteń erte turyp daıyndaldym. Jaqynda Glazgoda ótken álem chempıonatynda jeńiske jettim, sondaı-aq bul Ironman chempıonatyndaǵy ekinshi jeńisim. Men álem chempıonatynda elimniń qorjynyna taǵy bir altyn salǵanyma óte qýanyshtymyn», - dedi Aleksandr Vınokýrov.
Ol bul jeńisin óziniń 50 jyldyq mereıtoıy qarsańynda barsha qazaqstandyqqa, ásirese ata-anasyna arnaǵysy keletinin aıtty.
Aıta keteıik, aty ańyzǵa aınalǵan veloshabandoz qazir Astana Qazaqstan Team veloklýbynyń bas menedjeri. 16 qyrkúıekte 50 jyldyq mereıtoıyn atap ótedi. Ol óziniń mansabynda 2006 jyly Ispanıanyń Výeltasynyń jeńimpazy jáne toptyq jarysta 2012 jylǵy Olımpıada chempıony, sondaı-aq UCI demeýshiligimen ótken túrli bedeldi velojarystardyń jeńimpazy boldy.