İİM qazaqstandyqtardy jańa jyldyq mereke qarsańynda saq bolýǵa shaqyrdy, dep habarlaıdy aqshamnews.kz
Alaıaqtar qaýipti faıldar tirkelgen "jańa jyldyq quttyqtaýlardy" taratyp, sondaı-aq, baǵasy ádeıi tómendetilgen syılyqtar men taýarlar týraly jalǵan habarlandyrýlar jarıalaıdy.
"Aqsha aýdarylǵannan keıin baılanysty toqtatady. Alaıaqtar anımasıasy nemese mýzykasy bar jarqyn quttyqtaý jiberip, faıl arqyly parólderge, bank kartalaryna jáne qosymshalarǵa qol jetkizedi. Sondaı-aq, naryqtaǵy baǵadan edáýir tómen baǵada taýar nemese syılyq usynady. Aqshany shuǵyl túrde aýdarýǵa kóndiredi. Tólem jasalǵan soń habarlandyrýdy óshirip, jaýap bermeıdi", – dep jazylǵan habarlamada.
Polısıanyń habarlaýynsha, alaıaqtar jıi jalǵan akkaýnttar men qoldan jasalǵan pikirlerdi paıdalanyp, ózin senimdi satýshy retinde kórsetedi. Sondyqtan beıtanys satýshylarǵa aldyn ala aqsha aýdarmaı pikirler men akkaýnttyń tarıhyn muqıat tekserý qajet.
"Beıtanys adamdardan kelgen faıldar men siltemelerdi ashpaı, apk keńeıtimi bar faıldardy birden óshirgenińiz abzal. Qaýipsizdik bárinen mańyzdy. Ózińizdi jáne qarajatyńyzdy qorǵańyz", – dep jazylǵan habarlamada.