«Bastaý Bıznes» jobasy óz tıimdiligin kórsetti.
Almaty oblysy Qapshaǵaı qalasynda jeke bıznesin ashýǵa nıettengen azamattar «Eńbek» baǵdarlamasynyń múmkindikterin keńinen paıdalanýda. Osyndaı talapty azamattyń biri Kámshat Jandáýletova memleket qoldaýymen shaǵyn tigin atelesin ashty. Al kóp balaly ana Aıda Nurseıitova sán salonyn quryp, jumys isteýde, dep habarlaıdy Almaty-akshamy.kz Almaty oblysy ákiminiń baspasóz qyzmetine silteme jasap.
Qapshaǵaı qalalyq ákimdiginiń habarlaýynsha, azamattardy kásipkerlik negizderine oqytyp, olarǵa memlekettik grant berýde Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» baǵdarlamasynyń «Bastaý Bıznes» jobasy óz tıimdiligin kórsetti.
Máselen, sýretshi-modeler mamandyǵyn alǵan Kámshat Jandáýletova birneshe jyl Qapshaǵaıdaǵy túrli atelelerde jumys istep, tájirıbe jınaǵan, keıin «Bastaý Bıznes» arqyly kásipkerlikti qolǵa alýǵa nıettendi. Arnaıy kýrstan ótken soń óz bıznes jobasyn qorǵap shyqty. 583 400 teńge kólemindegi memlekettik grantqa ıe bolyp, bul somaǵa óndiristik tigin mashınasyn, torlap tigý men útikteýge arnalǵan tehnıkalar satyp alǵan. Sóıtip qazir «Kámshat» tigin stýdıasyn ashyp, jeke bıznesin júrgizip otyr.
Kámshat Jandáýletova kásibı sheberliginiń arqasynda 2012 jyly sán ónerinde talaby bar jas dızaınerler arasynda ótken «Jas maman» baıqaýynda júldeli oryn alǵan bolatyn. Kásipker aldaǵy josparlarymen de bólisti:
«Aldaǵy naýryz aıynda 2-5 mln teńgeniń grantyna qatyssam deımin. Qyz-kelinshekterdi tigin isine úıretetin stýdıa jáne tigin sehyn ashý josparymda bar», - deıdi Kámshat Jandáýletova.
Al kóp balaly ana Aıda Nurseıitova Qapshaǵaı qalalyq jumyspen qamtý ortalyǵy arqyly qysqa merzimdik kýrsta oqyp, shashtaraz kásibin meńgergen. Keıin memlekettik grant ıelenip, oǵan shashtarazdyqqa qajetti jabdyqtaryn aldy. Qazir «Ardaq» shaǵyn sulýlyq salonyn ashyp, kelýshilerge qyzmet kórsetýde.
Qapshaǵaı qalasy ákimdiginiń málimetinshe, Qapshaǵaıda 2021 jyly shaǵyn bıznesti damytýǵa 200 aılyq eseptik kórsetkish kóleminde 38 mln teńge shamasynda memlekettik grant berildi. Grant negizinen az qamtylǵan jáne kóp balaly otbasylarǵa, 29 jasqa deıingi jastarǵa, múmkindigi shekteýli jandarǵa, jumyssyzdar men ózin-ózi jumyspen qamtyǵan azamattarǵa berildi.