Ol jyl saıyn alty myń tonnadan asa taýarly balyq túrin alady.
Almaty oblysynda balyq sharýashylyǵy da damyp keledi. Bul óńirde balyq ósirýge mamandanǵan 24 balyq sharýashylyq sýbektisi bar, dep habarlaıdy Almaty-akshamy.kz.
Resmı málimet boıynsha, balyq sharýashylyǵymen shuǵyldanatyn kásiporyndar ótken jyly 943 tonna balyq ósirse, osy jyldyń 8 aıynda memlekettik qoldaýdyń arqasynda balyq sharýashylyǵy salasynda sýbsıdıalar túrinde olar 3 myń tonnadan astam daıyn ónim aldy.
«Mamandyǵy boıynsha ınjener-mehanık Ersaıyn Kóbenqulov uzaq ýaqyt Almaty qalasynda jumys istegen. Araǵa ýaqyt sala, týǵan ólkege oralyp, mal sharýashylyǵymen aınalysýǵa sheshim qabyldaǵan», – delingen Almaty oblysy ákimdiginiń baspasóz qyzmetiniń habarlamasynda.
Óz kásibin dóńgelentý úshin jas kásipker aldymen «Eńbek» memlekettik baǵdarlamasy aıasynda júzege asatyn «Bastaý Bıznes» jobasy boıynsha kásiptiń qyr-syryn meńgergen. Oqýyn aıaqtaǵan soń bolashaq kásipker jobasyn qorǵap, týǵan mekeni Kegen aýdanyna qarasty Taldy aýylynda jobany júzege asyra bastaǵan.
Ersaıyn birneshe myń forel shabaǵyn bulaq janynan salynǵan baseınge jiberedi. Bul onyń qazirgi tabysty kásibiniń bastaýy boldy.
«Sý temperatýrasy, aýyldyń klımaty foreldi ósirýge múmkindik berdi. «Eńbek» memlekettik baǵdarlama aıasynda alynǵan 4 mln teńge jeńildetilgen nesıe jaqsy bastama boldy. Bul somaǵa balyq ósirýge arnalǵan arnaıy baseınder turǵyzylyp, arnaıy qural-jabdyq pen jem satyp alyndy. Balyqty satylymǵa shyǵarý úshin 6 aıdan asa ýaqyt ketedi. Jylyna 2 ret, sáýir-mamyr aılarynda, ary qaraı damytýǵa bolatyn forel túrin alamyz», - deıdi kásipker.
