«Qaıyrymdy ister marafony»: 600 mln.teńgege kómek kórsetildi.
Almaty oblysynda jyl basynan beri 3000-nan astam qaıyrymdylyq aksıasy uıymdastyryldy. Nátıjesinde 16 000-nan astam kóp balaly otbasyna kómek kórsetildi. Bunyń barlyǵy «Qaıyrymdy ister marafony» jalpyulttyq jobanyń aıasynda júzege asyryldy, dep habarlaıdy Almaty-akshamy.kz.
2020 jyldyń sońy, el Prezıdenti Qasym-Jomart Toqaev Qazaqstan Táýelsizdiginiń 30 jyldyǵy aıasynda jalpyulttyq deńgeıde «Qaıyrymdy ister marafony» jobasynyń uıymdastyrylatynyn aıtqan edi. Sodan beri Jetisý jerinde ulttyq joba jolǵa qoıyldy.
«Jetisy Media» málimetinshe, osy ýaqytqa deıin, oblysta muqtaj otbasylardy áleýmettik qoldaý boıynsha 1652 naýqan, 1272 ekologıalyq aksıa, 76 janýarlarǵa kórsetilgen kómek jáne qorǵaýǵa baǵyttalǵan sharalar ótkizildi.
Qazaq, «saýsaq birikpeı, ıne ilikpeıdi» degen. Ulttyq mańyzǵa aınalǵan «Qaıyrymdy ister marafony» jobasyn jergilikti mesenattar, 2 JOO, 52 kolej, memlekettik mekemeler, qaıyrymdylyq qorlary, avtovolonterler jáne eriktiler uıymdary qoldady.
Nátıjesinde az qamtylǵan otbasylarǵa jáne jalǵyzbasty qarttarǵa kómek kórsetildi, áleýmettik jaǵdaıy tómen 89 otbasy baspanaly boldy.
Solardyń biri - Balqash aýdanynyń turǵyny Muhtar Dúmshebaev.
«Óńirimizdiń márt azamattarynyń arqasynda úıli boldyq. Qansha jylǵy armanymyz edi. Bir sharýashylyqta 20 jyl eńbek ettim. Qarapaıym sharýa adamymyn. Osy kezge deıingi eńbek aqtaldy. Qaıyrymdylyqtyń qaıyry bizgede tıdi. Qýanyshtymyz. Barsha qol ushyn sozǵan azamattarǵa alǵysymdy bildiremin», - deıdi Muhtar Dúmshebaev.
Almaty oblysynyń jomart jandary tek óńir halqyna kómek kórsetip qana qoımaı, Mańǵystaý oblysynda qýańshylyqtan shóp shyqpaı maldardyń qyrylýyna baılanysty qol ushyn sozdy. Olar, aımaq atynan gýmanıtarlyq kómek retinde 60 000-nan astam túk shóp jiberdi. Jalpy alǵanda «Qaıyrymdy ister marafony» jalpyulttyq jobasy aıasynda mesenattar men volonterler barlyǵy 600 mln. teńgege jýyq kómek kórsetti.
«17 aýdan men 3 qalada óńirlik front-keńselerdiń qyzmetkerleri volonterlerdi kóbirek tartý úshin belsendi úgit-nasıhat qyzmetin nusqaýshylar uıymdastyrady. Aldaǵy ýaqytta atalǵan jalpyulttyq jobany júzege asyrý jalǵasyn tabatyn bolady», - deıdi Almaty oblysy jastar saıasaty máseleleri basqarmasynyń basshysy Eldar Saparov.