9 mamyr kúni saǵat 21:00-de Abaı alańynda Uly Otan soǵysyndaǵy Jeńistiń 80 jyldyǵyna oraı almatylyqtar men qala qonaqtaryna erekshe jaryq shoýy usynylady – 500-den astam dron qatysatyn aýqymdy kórinis ótedi.
Kórsetilimniń basty ereksheligi – soǵys jyldarynda Qazaqstandy dańqqa bólegen batyrlardyń beınesi kórsetiledi. Almaty aspanynda aty ańyzǵa aınalǵan qaharman qyzdar Mánshúk Mámetova men Álıa Moldaǵulova, sondaı-aq, Baýyrjan Momyshulynyń beınesi jaryq arqyly jandanady. Zamanaýı tehnologıalar men jaryq anımasıasynyń kómegimen olardyń erligi men rýhyn jetkizetin kórinister arqyly elge tanystyrylady.
Dron-shoý barysynda eske alýdyń belgisi retinde tyrnalar da kórsetiledi. Al shoýdyń sońynda qazaqtyń oıý-órnegi aıasynda «Jeńis kúni qutty bolsyn!» degen jazý paıda bolady.
Bul zamanaýı vızýaldy shoý – batyrlarǵa taǵzym ǵana emes, soǵys týraly jańa, qoljetimdi, áserli ári este qalarlyq baıandaý túri. Ol tarıhı jadymyzdy saqtaý men keler urpaqqa jetkizýdiń mańyzdylyǵyn eske salady.
İs-shara demeýshilerdiń qoldaýymen barlyq qaýipsizdik talap saqtala otyryp uıymdastyrylady.
_Anyqtama:_ Uıymdastyrýshylar dron-shoýdy tamashalaýǵa arnalǵan birneshe yńǵaıly alań daıyndady. Basty oryndar: Abaı alańy, «Qazaqstan» qonaq úıiniń mańy, Caspian University janyndaǵy oryn jáne Abaı dańǵyly boıyndaǵy aýmaqtar – Nazarbaev dańǵylynan Dostyq dańǵylyna deıin.
İs-sharany daıyndaý jáne ótkizýge baılanysty 9 mamyr kúni saǵat 18:00-den 21:30-ǵa deıin qala ortalyǵynda avtokólik qozǵalysyna ýaqytsha shekteý engiziledi. Abaı dańǵylynyń Nazarbaev dańǵylynan Dostyq dańǵylyna deıingi bóligi, sondaı-aq, Dostyq dańǵylynyń Qurmanǵazy kóshesinen Sátbaev kóshesine deıingi aralyǵynda jol jabylady.
Almaty qalasynyń ákimdigi qala turǵyndary men qonaqtaryn baǵytty aldyn ala josparlaýǵa jáne ýaqytsha qolaısyzdyqqa túsinistikpen qaraýǵa shaqyrady.