Jeltoqsan oqıǵasy – Táýelsizdiktiń altyn tuǵyry. Ata-babalar ańsaǵan azattyqtyń shyraǵy jaǵylǵan sát. Osynaý tarıhı oqıǵanyń kýágerleri – Almaly aýdany «Jeltoqsan aqıqaty» patrıottyq qozǵalysynyń tóraıymy Gúlmıra Shanıgbaeva men orynbasary Ǵanı Qalmaqbaev QazUQPÝ quramyndaǵy Kásibı bilim berý koleji stýdentterimen kezdesti.
Olar «Jeltoqsannyń muzǵa janǵan alaýy...» taqyrybynda ótken tárbıe saǵatynda jastarǵa taǵlymdy áńgimeler aıtty. Iá, sonaý 1986 jylǵy Jeltoqsan oqıǵasy el jadynda áli kúnge jańǵyryp tur. Keńestik júıege qarsy turǵan Jeltoqsan kóterilisindegi qazaq jastarynyń otansúıgishtik sezimin keıingi urpaqqa nasıhattaı otyryp, sol kezdegi qurbandardy máńgi este saqtaý, táýelsizdik bastaýy yzǵarly Jeltoqsan oqıǵasy ekenin jete túsindirý, sol arqyly jas urpaq boıyna eline, jerine, ultyna degen patrıottyq sezimniń dánin sebý.
Atalǵan is-sharada aldymen elimizdiń Gımni oryndaldy. Jeltoqsanshy Ǵanı Mútálipuly – sol kezdegi alpaýyt eldiń aıbarynan seskenbeı, óz eliniń namysyn qorǵap, boıynda ulttyq rýhy aspandaǵan qazaqtyń órimdeı qyz-jigitterimen birge ortalyq alańǵa shyqqan azamat. «Qansha jyl ótse de Jeltoqsan júrekte jazylmaǵan jara, tarıhta qasiretti kún bolyp qalǵany ras. Biraq osy oqıǵanyń qalaı bolǵany týraly óskeleń urpaq bilýi kerek. Óıtkeni osy oqıǵaǵa bireýdiń ákesi, anasy, bireýdiń balasy qatysty. Qazaq jastary sol sátte kóshege shyǵyp, ún qatty. El táýelsizdigin talap etti. Elmen sanaspaı istelgen iske, shyǵarǵan sheshimge halyq narazy ekendikterin kórsetti. Bul tarıhtaǵy taǵy bir sabaq boldy. Sondyqtan bul qazaq halqynyń oıy, muńy bolyp bastaldy da arty úlken ózgeriske ákelgen bolatyn», – dedi ol.
Sonymen qatar, Gúlmıra Belǵojaqyzy óz oıyn jetkizdi. «Birimiz bul kúndi Táýelsizdik merekesi desek, ekinshimiz táýelsizdikke qol jetkizýge qadam jasaǵan qaraly kúnderdiń biri deımin...
Shynyn aıtý kerek, jeltoqsan bir jaǵynan qaraly kún. Qanshama jalyndy jastyń ómiri qıyldy. Mereke dep te aıta almaımyn, biraq Táýelsizdik bastaýy degendi qoldaımyn. Biraq bul kúni osyndaı tárbıelik mańyzy bar kezdesýler, tarıhı sátke negizdelgen kınolar qoıyp, patrıottyq ánder oryndalǵany durys. Ár zamannyń jastary sol ýaqyttyń talabyna saı tárbıelenedi. Desek te, jastardan úlken úmit kútemiz. Búgingi jastar qazaqtyń basty baılyǵy táýelsizdik ekenin shynaıy sezinse, babalar muratynyń oryndalǵany bolar edi», – dedi ol.
Bul is-sharada patrıottyq ánder aıtylyp, óleńder oqyldy. Qazaq eliniń ótkeni men búginin beıneleıtin beınerolıkter kórsetilip, ustazdar qaýymy men kolej dırektory A.Qarabaeva Jeltoqsan oqıǵasynyń mańyzy týraly aıtyp, óz pikirlerin bildirdi, jastardy elim degen el azamattaryn qurmetteýge shaqyrdy. İs-shara sońynda Á.Tinálıevtiń «Jeltoqsan jeli» ánin qyzdar hormen oryndady.
Top jetekshisi Nurgúl Abdramanqyzy jeltoqsandyq jastar umytylmaı, erlikteri este máńgilik saqtalatyndyǵyn aıtyp, meımandarǵa alǵys bildirdi.