13 tamyzda, Qaraǵandy oblysynyń prokýratýrasy áleýmettik jelilerde ultaralyq arazdyqtyń órshýi týraly mańyzdy málimdeme jasady, - dep habarlaıdy Aqshamnews.kz tilshisi.
"Qazaqstan Respýblıkasynyń Konstıtýsıasy, ultaralyq kelisimdi buzýǵa ákep soǵýy múmkin kez kelgen áreketke tyıym salady", - delingen habarlamada.
Ultaralyq arazdyq – qoǵamdyq turaqtylyq pen birlikke tónetin eń qaterli qaýipterdiń biri.
Mundaı áreketterdiń saldary – jappaı tártipsizdikterge, áleýmettik qurylymnyń buzylýyna, sondaı-aq etnostar men mádenı toptar arasyndaǵy tereń qaıshylyqtarǵa alyp kelýi múmkin.
Atalǵan quqyqbuzýshylyqtardyń jasalý alańy retinde «Instagram», «TikTok», «Threads» sıaqty áleýmettik jeliler tanylyp otyr. Bul platformalarda árbir qoldanýshyǵa pikir bildirý bostandyǵy berilgen.
Alaıda ultaralyq arazdyqty qozdyratyn pikirler Qazaqstan Respýblıkasynyń Qylmystyq kodeksiniń 174-babyna sáıkes qylmystyq jaýapkershilikke ákep soǵady. Atap aıtqanda, bul bap boıynsha 2 jyldan 7 jylǵa deıin bas bostandyǵynan aıyrý, al aýyr zardaptarǵa ákelgen jaǵdaıda – 12 jyldan 20 jylǵa deıin bas bostandyǵynan aıyrý jazasy qarastyrylǵan. Bul áreketter ekstremıstik qylmystar sanatyna jatady.
Mundaı quqyqbuzýshylyqtar úshin kináli tulǵalar belsendi ókinish bildirýine, jábirlenýshi tarappen tatýlasýyna, qylmystyq árekettiń eskirý merziminiń ótýine nemese raqymshylyq aktisine baılanysty qylmystyq jaýapkershilikten jáne jazadan bosatylmaıdy.
Tájirıbe kórsetkendeı, quqyq qorǵaý organdary tarapynan tulǵasy anyqtalǵannan keıin, kináli azamattar óz is-áreketine ókinip, kópshilik aldynda keshirim suraıdy. Alaıda bul olardyń jaýapkershiligin joıýǵa negiz bolyp tabylmaıdy.
Osyǵan baılanysty barlyq azamatty zań talaptaryn saqtaýǵa, árbir habarlamaǵa jáne aıtylǵan sózderge jaýapkershilikpen qaraýǵa shaqyramyz.
Qoǵamdaǵy beıbitshilik, turaqtylyq pen senimdi tek ortaq quqyqtyq mádenıet pen ózara qurmet arqyly ǵana saqtap qalýǵa bolady.