30 maýsym kúni 28 gvardıashyl-panfılovshylar atyndaǵy saıabaqta Almaty qalasy Jastar saıasaty basqarmasynyń qoldaýymen, Almaty qalasy Jastar saıasatyn damytý memlekettik qory jáne Almaty qalasy Polısıa departamentiniń Esirtki qylmysyna qarsy kúres basqarmasymen birlesip halyqaralyq nashaqorlyqqa qarsy kúres kúnine arnalǵan «Biz salaýatty ómir salty úshin!» konserttik aksıasy ótti.
İs-shara barysynda qala turǵyndary, jasóspirimderi men jastary DO tárbıelenýshileri daıyndaǵan konserttik baǵdarlamany tamashalap, «Biz esirtkige qarsymyz!» taqyrybyndaǵy vıktorınaǵa qatysty. Sonymen qatar, is-shara aıasynda qolóner buıymdary jáne «Biz salaýatty ómir salty úshin!» plakattar kórmesi men DO oqytýshylarynyń sheberlik sabaqtary ótti. Baıqaý jeńimpazdaryna sımvolıkalyq syılyqtar berildi, dep habarlaıdy Almaty-akshamy.kz.
Almaty qalasynyń kınologıalyq qyzmet kórsetý ortalyǵynyń qyzmetkerleri «Búrkit» qyzmettik-izdestirý ıtimen ishinde esirtki zattarynyń ımıtatorlary bar zattardy irikteý boıynsha qoıylym ótkizdi. Qoıylymnan keıin barlyq nıet bildirýshiler búrkitpen oınap, onymen estelik fotosýretke tústi.
Aksıa sońynda, Balalardy qorǵaý kúnine jáne nashaqorlyqqa qarsy kúres aılyǵyna arnalǵan «RYH - MARAFON» XIX-shy jalpyqalalyq spartakıadasynyń jeńimpazdary saltanatty túrde marapattaldy.
Týrnır kestesiniń qorytyndysy boıynsha júldeli oryndar kelesideı bólindi:
III oryndy «Barys» Demalys ortalyǵynyń komandasy ıelendi;
II oryn – «Darhan» DO komandasy;
I oryndy «Kókjıek city» DO komandasy ıelendi.
Eske sala keteıik, bıylǵy spartakıadanyń basty ereksheligi týrnırge qatysýshylardy qoldaýshy DIEGO jolbarysy boldy. Ol sportshylardy qıyndyqtardy jeńýge jáne alǵa qoıǵan maqsattaryna jetýge jigerlendiretin kúshtiń, kúsh pen jeńiske degen umtylystyń sımvolyna jáne qatysýshylardyń dosyna aınaldy.
Spartakıada 3 - 27 maýsym aralyǵynda sporttyń 5 túrinen: 600 jáne 800 metrge júgirýden, shaǵyn fýtbol, strıtbol, ústel tenısi jáne boýlıńten týnırler ótkizilgen bolatyn. Jeńimpaz komandalarǵa qurmet gramotalary, medaldar, kýboktar jáne syılyqtar tabys etildi.
