Bıyl barlyǵy 20 myń adamǵa grant berý josparlanyp otyr
QR Eńbek jáne halyqty áleýmettik qorǵaý mınıstrligi Jastar praktıkasyna jáne «Alǵashqy jumys orny» jobasyna qatysý merzimin 12 jáne 18 aıǵa deıin ulǵaıtýdy josparlap otyr, dep habarlaıdy Almaty-akshamy.kz
2016 jylǵy buıryqqa engiziletin ózgerister aıasynda jastarǵa jáne halyqtyń áleýmettik osal toptaryna beriletin bıznesti damytýǵa arnalǵan grant kólemin bıyl 400 AEK-ke, ıaǵnı, 1,2 mln teńgege ulǵaıtý kózdelgen. Grant jastar men halyqtyń áleýmettik osal toptaryn óz isin ashý úshin bastapqy quraldarmen qamtamasyz etedi. Bıyl barlyǵy 20 myń adamǵa grant berý josparlanyp otyr.
Qaǵıdaǵa engizilgen ózgeristermen Jastar praktıkasyna jáne «Alǵashqy jumys orny» jobasyna qatysatyn jas mamandardyń jalaqy mólsherin 30 AEK-ke deıin ulǵaıtý, sondaı-aq jastar praktıkasyna jáne «Alǵashqy jumys orny» jobasyna qatysý merzimin tıisinshe 12 jáne 18 aıǵa deıin uzartý josparlanýda.
Bul ózgerister jastardyń alǵan mamandyǵy boıynsha jumys ornyna sátti beıimdelýine jáne bekitilýine yqpal etedi. Bıyl Jastar praktıkasyna keminde 22 myń adamdy jiberý, sondaı-aq «Alǵashqy jumys orny» jobasyna keminde 3 myń jastyń qatysýyn uıymdastyrý josparlanǵan.