Almaty qalasynda alǵash ret elimizdiń barlyq óńirinen kelgen 9 – 10 synyp oqýshylary arasynda 11 memlekettik kolej bazasynda «JasSkills Kazakhstan – 2025» respýblıkalyq baıqaýy ótti. WorldSkills halyqaralyq chempıonatynyń formaty men standarttaryna sáıkes Almaty memlekettik bıznes kolejinde «Naýbaıshy sheberligi» quzyrettiligi boıynsha chempıonat uıymdastyryldy.
10-ǵa jýyq óńirden jınalǵan ári alyp shaharǵa til úıirer as ázirleýge kelgen oqýshylar – qalalyq kezeńnen oza shaýyp, jeńimpaz atanǵandar.
– Qazaqstannyń Oqý-aǵartý mınıstrligi Almaty qalasy Bilim basqarmasymen birlese otyryp, bizge úlken jaýapkershilik artty. Konkýrsqa ártúrli mamandyq boıynsha 20 óńirden 90-ǵa jýyq oqýshy jınaldy. «Naýbaıshy sheberligi» konkýrsynyń dál bizdiń kolejde ótken sebebi – WorldSkills baıqaýynda jeńimpaz atanýymyzben baılanysty. Aldymyzda turǵan basty mindetterdiń biri – «Jumysshy mamandyqtardyń» mártebesin kóterý. Buryn jastar ekonomıs, zańger mamandyqtaryna kóp qyzyǵýshylyq tanytsa, qazir aspaz, grafıkalyq dızaın, mobılografıa boıynsha oqýǵa suranys artty. Men buǵan shyn qýanyshtymyn! Osy oraıda aıta keteıin, búgingi saıystan 1-oryn alǵan oqýshyǵa basshylyq tarapynan Almaty memlekettik bıznes kolejinde oqý úshin grant syılaımyz, – dedi Almaty memlekettik bıznes kolejiniń dırektory Aınur Mýkajanova.
Aıta keteıik, «Naýbaıshy sheberligi» quzyrettiligi boıynsha «Daren» JSHS bas naýbaıshysy Dmıtrıı Skopsov, «İnjý» meıramhanasynan Jansulý Ábenbaı, «Aspaz» JSHS, qoǵamdyq tamaqtaný ınjener-tehnology Mýrad Hılaev ádilqazylyq etedi.
• Taqyrypqa oraı
Batyrhan DOSYMOV, qatysýshy:
Aspaz bolǵym keledi
Almaty qalasy №169 mektep-lıseıiniń 9-shy oqýshysymyn. Bolashaqta da as ázirleý salasy boıynsha jumys istegim keletindikten, saıysqa qatysyp jatyrmyn. Baıqaýǵa úsh apta daıyndaldym.
Dına Eleýsinova, qatysýshy:
Uıymdastyrý deńgeıin joǵary baǵalaımyn
Astana qalasynan keldim. Maqsatym – jeńis bolsa da, jeńilis bolsa da qatysyp, tájirıbe jınaqtaý ári as ázirleý salasyna degen qyzyǵýshylyǵymdy synaý. Saıysqa úsh kún daıyndaldym. Bolashaqta aspaz bolýdy armandamasam da, qamyr ılep, túrli desert daıyndaǵan unaıdy. Qazir saıys qyzý júrip jatyr. Nan, toqash, tátti bálish sekildi taǵamdardy daıyndaý úshin barlyq kerekti ónimder bar. Sondyqtan uıymdastyrý deńgeıin joǵary baǵalaımyn.
Qarlyǵash AHMETOVA, jetekshi:
Oqýshymnan jeńis kútemin
Qyzylorda qalasynyń №290 orta mektebinen 9-synyp oqýshysy Káýsar Baqytjan esimdi oqýshymdy ákeldim. Qatysýshylar 3 modýl boıynsha baq synasady. Birinshi klasıkalyq úlgide nan pisiredi, ekinshi toqash daıyndaıdy jáne tátti bálishter ázirleıdi. Baıqaýǵa eki apta daıyndaldyq, oqýshymnan jeńis kútemin.
