Respýblıka saraıynda «Jas qanat - 2023» jas oryndaýshylardyń respýblıkalyq baıqaýy aıaqtaldy. Araǵa úsh jyl salyp zaman talabyna saı jańa leppen qaıta oralǵan án baıqaýy bıyl Almatyda 29-ret uıymdastyrylyp otyr.
Baıqaýdyń sońǵy kúni elimizdiń ár óńirinen kelgen 20 qatysýshynyń arasynan upaı sany boıynsha aqtyq synǵa joldama alǵan 8 úmitker synǵa tústi. Fınalda saıyskerler belgili kompozıtor, dırıjer jáne óńdeýshi Ilá Bashqatovtyń jetekshiligimen tamasha kásibı Live bendynyń súıemeldeýimen óner kórsetti. Muny «Jas qanat» baıqaýynyń jańalyǵy deýge bolady.
Ilá Bashkatovtyń aıtýynsha, repertýar boıynsha konkýrstyq konsertterge engen ánderdiń basym bóligin qatysýshylar ózderi tańdaǵan.
Sonymen, qazylar alqasynyń sheshimimen baıqaýda alǵash ret taǵaıyndalǵan Murat Erǵalıev pen Aleksandr Ponomarev atyndaǵy «Jas qanat – 2023» baıqaýynyń bas júldesi – Gran-prı atyraýlyq Ernazar Jubanǵa buıyrdy. «Altyn qanatty» (1-oryn) Aqtóbeden kelgen arý Narǵyz Januzaqova ıelendi. «Kúmis qanat» (2-oryn) almatylyq Benazır Álimhodjaeva berilse, «Qola qanatty» (3-oryn) almatylyq Almagúl Battalıeva qanjyǵasyna baılady. Qalǵan tórt fınalıst – oraldyq Arýjan Bısembaı, petropavldyq Narıman Joldasbekov, pavlodarlyq Mádına Qabdolla jáne shymkenttik Nurasyl Satybaldy baıqaýdyń dıplomanty atandy.
Úmitkerler baıqaýdyń úshinshi kúni jaz janrynda, negizinen, qazaq, orys, aǵylshyn tilderinde óner kórsetti. Elimizdiń ár óńirinen kelgen jas oryndaýshylardyń ishinde osaly joq. Ádilqazy músheleriniń aıtýynsha, olar ózderiniń shyn talant ekenin baıqaýdyń alǵashqy kúninen-aq baıqatqan. Sol sebepti shyn talantty anyqtaýda eshqandaı kelispeýshilik bolǵan joq.
Júldeli oryndardan bólek qatysýshylarǵa, yntalandyrý retinde ádilqazylar men jan-jaqty qoldaý kórsetken seriktes kompanıalar arnaıy syılyqtaryn tabys etti.
Almaty qalasynyń negizgi aqparat quraldarynyń basyn biriktirgen «Alatau aqparat» JSHS medıaholdınginiń Bas dırektory Erjan Qalymbaıuly án álemine qanat qaqqan jas talanttarǵa júrekjardy lebizin bildirip, arnaıy syılyǵyn tabystady.
– Armysyzdar, ardaqty ónersúıer qaýym! Búgin erekshe kesh ótti. Ǵalamat sharany uıymdastyrýǵa qoldaý bildirgen azamattarǵa, sonymen qatar, án dodasynda baq synaǵan barlyq qatysýshylarǵa ózimniń alǵysymdy bildirgim keledi. Ásem Almatynyń baýraıyna «Jas qanat» baıqaýynyń qaıta túleýi, bul – qazaq rýhanıatyna úlken olja, tarıhı oqıǵa dep sanaımyz. Kezinde osy baıqaýdan túlep ushqan talaı daryndy, talantty ónerpazdar búginde qazaq mádenıetiniń bir-bir darabozdaryna aınalyp, qazaq ónerine úles qosyp júr. Búgingi jas talanttarǵa aldyńǵy tolqyn aǵa-apaılarynyń jolyn bersin dep tileımiz. Qazaqta juldyzyń bıik bolsyn, juldyzyń joǵary bolsyn! - degen ádemi sóz bar. Án áleminde jaryq juldyz bolyp janatyn jastarymyzdyń óneri qazaqtyń dalasynda ǵana emes, álemniń kóginde sharyqtaıtynyna senemiz. «Alatau Aqparat» medıaholdıngi olardyń jeńisti, qýanyshty sátterin – árqashan súıinshilep halyqqa jetkizýge daıyn. Ónerlerińiz ústem bolsyn! Qazaq mádenıeti jasaı bersin! - dedi ol.
Medıaholdıng basshysy Erjan Qalymbaıuly saıyskerlerdiń arasynan fınalǵa ótpese de marapatqa laıyq dep tanyǵan Dıas Jorabekke «Alatau aqparat» medıaholdınginiń atynan jyl on eki aı boıy FITNESSBLITZ fıtnes klýbynda daıyndalýyna jáne DREAM-MOMENTS dúkeninen qalamyzdyń eń kórikti jerlerin kórip rýhanı lázzat alýyna joldama usyndy.
Al Medeý Arynbaev petropavldyq Narıman Juldyzbekov pen oraldyq Arýjan Bısembaıdy qazaq ánine degen qurmeti úshin óziniń arnaıy syılyǵyn usyndy. Renat Gaısın Nurasyl Satybaldymen yntymaqtasa jumys isteıtinderin aıtyp, óz qanatynyń astyna alatynyn jetkizdi. Al Baıǵalı Serkebaev óziniń «Emporio Music Fest» mýzykalyq festıvaliniń arnaıy júldesin Ernazar Jubanǵa tabys etti. Ol 5-7 shilde aralyǵynda Shveısarıada ótetin, álemniń eń tanymal mýzykanttary bas qosatyn áıgili «Montreux Jazz Festival» jaz festıvaline joldama bolatyn. Fınalısterden basqa, konkýrstyń taǵy 12 qatysýshysy dıplom-sertıfıkattar aldy.
Bıyl «Jas Qanat – 2023» baıqaýynan bólek, ańyzǵa aınalǵan «Azıa daýysy» festıvali de qaıta jandanýda. Oǵan daıyndyq barysynda Temirbek Júrgenev atyndaǵy Qazaq ulttyq óner akademıasy men halyqaralyq «Azıa daýysy» festıvaliniń basyn qosqan qyzyqty shyǵarmashylyq joba uıymdastyrylǵan bolatyn. Joba aıasynda akademıa stýdentteri arasynda festıváldiń erekshe stılin saqtaı otyryp, jańa sahnaǵa senografıa jasaý tapsyrylǵan. Komısıa tapsyrmanyń sátti ári joǵary deńgeıde oryndaǵan Dana Nurshaeva men Álıhan Satybaldyny jeńimpaz dep tanydy. Arnaıy syılyqpen marapattalǵan jeńimpazdar «Azıa Daýysy 2023» festıvaline senografıa jasaý úshin shyǵarmashylyq topqa shaqyryldy.
Almatyda «Azıa daýysy» men «Jas qanattyń» qaıta jandanýyn armandaǵan Murat Erǵalıev pen Aleksandr Ponomarevtyń oń qoly bolǵan tulǵa, baıqaýdyń uıymdastyrýshysy, «Azıa daýysy» stýdıasynyń basshysy Irına Kovyrákonyń aıtýynsha, «bul án burynǵy ánnen ózgerek» boldy. Birinshiden, jandy mýzyka! Úmitkerlerdi 60 adamnan turatyn eń myqty orkestr súıemeldedi. Ekinshiden, Live bend boldy. Saıyskerlerdiń keremet óner kórsetkeni sonsha, barlyǵy 2 shildede ótetin «Azıa daýysy pıknıgine» shaqyryldy.
– Endi biz «Jas qanat – 2024» baıqaýyna daıyndyqty bastaımyz. Qýandym, jyladym... Saıyskerler án salǵanda janarym jasqa tolyp, tolqyǵan sátterim kóp boldy. Men úshin kıeli sahnadaǵy árbir sát emosıaǵa toly áser qaldyrdy, - dedi ol baıqaý sońynda.
Baıqaý sońynda úsh kún boıy jas talanttardyń úmit toly janary men lúpil qaqqan júreginiń dúrsiline kýá bolǵan almatylyq kórermender «Jas qanat – 2023» jaqqan jańa juldyzdarǵa qol shapalaqtap, qoshemet kórsetti.
P.S. «Alatau aqparat» JSHS medıaholdıngi «Jas qanat – 2023» án baıqaýyna syılyq usynǵan seriktesterimiz – DREAM MOMENTS dúkenine jáne FITNESS BLITZ fıtnes klýbtar jelisine shyn júrekten alǵys bildiredi!