Jumysshy mamandyqtar jyly – eńbek naryǵyndaǵy ózekti máselelerdi sheshýge baǵyttalǵan iri bastama. Túrkistan oblysynda osy baǵytta júıeli jumystar atqarylyp, naqty nátıjelerge qol jetkizilýde. Oblys ákimi Nuralhan Kósherovtyń tóraǵalyǵymen ótken jıynda osy másele keńinen talqylandy.
Bastamanyń negizgi maqsaty – jastardyń tehnıkalyq jáne óndiristik mamandyqtarǵa qyzyǵýshylyǵyn arttyrý, jumyssyzdyq deńgeıin tómendetý jáne eńbekke qurmet sezimin qalyptastyrý. Sonymen qatar jańa jumys oryndaryn ashý, sheteldik ınvestorlarmen birlesken kásiporyndarǵa otandyq kadrlar daıarlaý, kásibı bilimniń qoljetimdiligin qamtamasyz etý kózdelgen.
Búginde oblystaǵy 50 tehnıkalyq jáne kásibı bilim berý uıymynda 47 myńnan astam stýdent 84 mamandyq boıynsha oqyp jatyr. Jańa oqý jylynda 15,5 myń grant bólinip, sonyń ishinde 8 880 grant jumysshy mamandyqtaryna berildi. Dýaldy júıemen 31 myńnan astam stýdent bilim alýda. Ótken jyly kolej túlekteriniń 75 paıyzdan astamy jumysqa ornalasqan.
Jyl basynan beri aımaqta 64 bos jumys oryndary jármeńkesi uıymdastyrylyp, 7 myńǵa jýyq vakansıa usynyldy. Sonymen qatar 10 myńnan astam oqýshy men stýdent 37 kásiporynda bolyp, óndiristiń jumys barysymen tanysty. Kolejderde startap jobalar qolǵa alynyp, halyqaralyq akredıtasıa júrgizilýde.
Jalpy 2025 jyly «Aımaqtyq karta» aıasynda 130 myńnan astam jumys orny ashý josparlanǵan. Qyrkúıek aıyna deıin onyń 100 myńnan astamy iske asyrylyp, 32 myńnan astamy jumysshy mamandyqtaryna arnaldy.
Túrkistan oblysynda júrgizilip jatqan bul jumystar eńbek naryǵyndaǵy suranysqa jaýap berip qana qoımaı, jastardyń kásibı biliktiligin arttyryp, aımaqtyń turaqty damýyna yqpal etýde.