Japonıada qart adamdar arasynda túrmege óz erkimen barý qubylysy jıilep keledi. Bul týraly Aqshamnews.kz saıty habarlaıdy.
CNN-niń derekterine súıensek, eldegi eń iri áıelder túrmeleriniń biri qart adamdarmen toltyrylǵan. Túrme qyzmetkerleriniń aıtýynsha, jalǵyzdyq máselesi sonshalyqty ózekti bolǵandyqtan, kóptegen qart adamdar erkindikten góri túrmede qalýdy jón kóredi.
Totıgı túrmesiniń qyzmetkeri Takaesı Sıranaga atap ótkendeı:
"Keıbireýler tipti munda ómir boıy qalý úshin aıyna 20-30 myń ıen tóleýge daıyn."
Túrmede jazasyn ótep jatqan qart adamdar turaqty tamaqtaný, tegin medısınalyq kómek jáne áleýmettik qoldaý alady. Bul artyqshylyqtar olardyń syrtqy ómirge qaraǵanda túrmede ózin qaýipsiz sezinýine yqpal etedi.
81 jastaǵy áıel, túrmede tamaq urlaǵany úshin jazasyn ótep jatqanyn aıta otyryp:
"Bul túrmede jaqsy adamdar bar. Múmkin, bul meniń eń turaqty ómirim shyǵar," – dep bólisti.
Japonıada 65 jastan asqan adamdardyń 20%-y kedeılikte ómir súredi. Kóptegen qarttar ashtyq, sýyq jáne medısınalyq shyǵyndar sıaqty qıyndyqtarǵa tap bolady. Sıranaga túsindirgendeı:
"Keıbir adamdar munda sýyqtan nemese ashtyqtan qorǵaný úshin keledi. Olar túrmede bolǵanda tegin medısınalyq kómek alady, biraq bostandyqqa shyqqan soń ony ózderi tóleýi tıis. Sondyqtan munda barynsha uzaq qalýǵa tyrysady."
Bul jaǵdaı memleketke qarttardyń ómir súrý sapasyn jaqsartý boıynsha qosymsha sharalar qabyldaý qajettigin meńzeıdi.