13 qazan kúni saǵat 18:00-de Almatynyń Ortalyq stadıonynda ÝEFA Ulttar lıgasynyń toptyq kezeń aıasynda Qazaqstan – Slovenıa machy ótedi.
Almatynyń Sport basqarmasy fýtbolsúıer qaýymdy bıletti aldyn ala Qazaqstan fýtbol federasıasynyń resmı seriktesi Ticketon qyzmetinen satyp alýǵa jáne dúrligip, yǵy-jyǵy bolmas úshin Ortalyq stadıonǵa erterek kelýge shaqyrady. Bılet stadıon kasasynda satylmaıdy. Deldaldardan bılet satyp almańyz. Ortalyq stadıonǵa saǵat 16:00-den bastap kirýge bolady.
Kórermender úshin mach aldyndaǵy qyzyqty baǵdarlama daıyndalǵan.
Ótkizý júıesin jaqsartý úshin bıletke adamnyń aty-jóni jazylady. Stadıonǵa bılette jazylǵan adam jeke basyn kýálandyratyn qujatyn (jeke kýálik, tólqujat, júrgizýshi kýáligi) kórsetken soń kirgiziledi.
Jolaýshylar leginiń artýyna baılanysty qala turǵyndary men qonaqtaryna yńǵaıly bolý úshin Ortalyq stadıon arqyly ótetin №34, 92, 118, 120, 120a, 79, 121 avtobýstarynyń baǵyty kúsheıtiledi.
Sondaı-aq, qosymsha 8 avtobýs bólinip, tegin ekspress-marshrýttar uıymdastyrylady:
* «Shuǵyla-City TÚK aıaldamasy – Ortalyq stadıon»;
* «Halyk Arena aıaldamasy – Ortalyq stadıon»;
* «Alataý teatry aıaldamasy – Ortalyq stadıon»;
* «Almaty-1 temirjol vokzaly aıaldamasy – Ortalyq stadıon».
Avtobýstar saǵat 16:00-de júrip, 20:30-da keri qaıtady. Ortalyq stadıonnan shyǵatyn avtobýstar Abaı dańǵyly men Sátbaev kóshesiniń arasyndaǵy Baıtursynov kóshesiniń boıyndaǵy turaqta turady.
Sonymen qatar, jedel marshrýttardyń jınalý oryndary 2GIS servısinde jazylady.