Almaty qalasynda KVI boıynsha epıdemıologıalyq jaǵdaı kúrt nasharlaǵan.
Almaty halqynyń ımýndyq qabat jetkilikti mólsherde qalyptasqan joq. Búginde ol 40%-dy quraıdy. Vaksına qarqynynyń jetkiliksizdigi jáne naýqastar sanynyń artýy saldarynan qalada karantındik sharalar kúsheıtildi. Almaty qalasynyń bas sanıtarlyq dárigeri Jandarbek Bekshın Óńirlik komýnıkasıalar qyzmetinde ótken shuǵyl brıfıńte atalǵan shekteýlerdiń neden týyndaǵanyn túsindirdi, dep habarlaıdy Almaty-akhamy.kz.
Jandarbek Bekshınniń aıtýynsha, Almaty qalasynda KVI boıynsha epıdemıologıalyq jaǵdaı kúrt nasharlaǵan. Ótken táýlikte megapolıste 1 080 juqtyrý jaǵdaıy tirkeldi.
«Mundaı ósim densaýlyq saqtaý júıesine, medısına qyzmetkerlerine qıyndyq týdyrady. Óıtkeni ımýndyq qabat áli de jetilmegen. Qaladaǵy jaǵdaıdy turaqtandyrý úshin bizge halyqtyń 70% vaksına alý qajet. Búginde bizdegi málimet boıynsha, ımýndyq qabat 40%-dy quraıdy. Koronavırýstyń taralýy ımmýndalmaǵan jáne aýyrmaǵan azamattar arasynda júrip jatyr», – dedi Jandarbek Bekshın.
Almatynyń bas sanıtarlyq dárigeri vırýs juqtyrǵandardyń ósýi «delta» koronavırýs nusqasynyń taralýynan dedi. Bul shtamm óte juqpaly ári aýyr klınıkalyq kórinisterdi týdyrady.
«Sońǵy aptada «sımptomdyq» naýqastardyń úles salmaǵynyń 88%-dan 90%-ǵa deıin ósýi baıqaldy. KVI aýrýshańdyǵy 1,4 ese ósti, táýliktik ósim 1%-dan asty. Bul asa qatań shekteý sharalaryn engizýdi talap etetin qoǵamda KVI taralýynyń ósý qarqynyn kórsetedi», – dedi Jandarbek Bekshın.
Brıfıń barysynda megapolıstiń bas sanıtarlyq dárigeri almatylyqtardy ekpe alýǵa shaqyrdy. Sebebi ekpelerdiń tıimdiligi 90%-dan asady.
«Biz qaıtadan aýyrǵan azamattarǵa monıtorıń júrgizemiz. Búginde bizde vaksınanyń tolyq sıklynan keıin 178 adam aýyryp qaldy. Sebebi barlyq vaksınalar júz paıyz qorǵaýdy qamtamasyz etpeıdi jáne deneniń de erekshelikterin eskerý qajet. Biz aýyryp saýyqqandarǵa 6 aıdan keıin vaksınadan ótýdi usynamyz. Bul ımýnıtetti kúsheıtedi», – dedi Jandarbek Bekshın.
Bas sanıtarlyq dáriger delta shtamynyń juqpaly bolýy buryn «brıtandyq» koronavırýs shtamynan áldeqaıda joǵary ekenin aıtty.
«Eger ótken jyly negizgi «Ýhan» shtamy sımptomdardyń 50%-na deıin berilse, «Brıtandyq» shtamm boıynsha sımptomdar 60%-ǵa deıin ósti. «Delta» belgileri 88-90%-dy quraıdy. Infeksıalyq stasıonarlardyń jaǵdaıy kúrdeli. Osyǵan baılanysty biz ınfeksıany boldyrmaýǵa múmkindik beretin jańa qaýly qabyldadyq», – dep túsindirdi Jandarbek Bekshın.
Sanıtarlyq-epıdemıologıalyq departament basshysy qala turǵyndaryn betperde rejımin saqtaýǵa, buqaralyq is-sharalarǵa qatyspaýǵa shaqyrdy.