Almatyda mereke kúnderi 215 bala dúnıege keldi
Qazaqstan Respýblıkasynyń Táýelsizdik kúni dúnıege kelgen 2 myńnan astam sábıge táýelsizdiktiń 30 jyldyq mereıtoıyna oraı baby-bokstar syıǵa tartyldy, dep habarlaıdy Almaty-akshamy.kz.
«Súıinshi» syıqorabyna bóbekterge qajetti zattardan basqa QR Prezıdenti Qasym-Jomart Toqaevtyń quttyqtaý tilegi jazylǵan ashyq hat, «Táýelsiz Qazaqstanǵa 30 jyl» monetasy men balanyń týýy týraly kýáligi salynǵan.
«Aınalaıyn, bóbek! Seniń týǵan kúniń elimizdiń eń basty merekesimen tuspa-tus keldi. Óziń dúnıe esigin ashqan kezde halqymyz qasterli Táýelsizdiginiń 30 jyldyǵyn atap ótip jatty. Saǵan baqytty ári uzaq ǵumyr tileımin!», - dep jazylǵan Prezıdenttiń quttyqtaýynda.
16 jáne 17 jeltoqsanda týǵan balalarǵa týý týraly kýálikti alý týraly ótinimderdi «Azamattarǵa arnalǵan úkimet» memlekettik korporasıasynyń qyzmetkerleri qabyldap, ári qaraı Qazaqstan azamatynyń alǵashqy qujatyn resimdeý úshin AHAJ organdaryna joldandy.
«Ózderińiz biletindeı, bala týǵannan keıin olarǵa balanyń birinshi qujatyn proaktıvti túrde rásimdeý usynysymen sms keledi. Sondaı-aq, ótinishti portal nemese HQO arqyly berýge bolady. Bizdiń qyzmetkerler perzenthanalarǵa baryp, bosanǵan áıelderden tikeleı ótinish aldy. Almaty qalasy boıynsha mereke kúnderi 215 bala dúnıege keldi. Bizdiń qyzmetkerler qujattardy odan ári jedel daıyndaý úshin AHAT-qa jiberdi. Barlyq mereke kúnderi HQO-nyń, Qazposhtanyń barlyq qyzmetkerleri Prezıdenttiń quttyqtaýy men sábı bokstaryn jetkizý úshin, bokstardy daıyndaý jumystaryn júrgizdi», - deıdi «Azamattarǵa arnalǵan úkimet» memlekettik korporasıasy Almaty qalasy boıynsha fılıalynyń dırektory Ermek Quralbekuly Bekjúnisov.
Barlyq baby-bokstar ıelerine Qazposhta arqyly jóneltildi.
«Dúnıege sábıimiz kelip bir qýansaq, «Súıinshi» qorabyn alyp qýanyshymyz eselenip jatyr. Onyń ústine sábıimiz mereke kúni dúnıege keldi... Qýanyshymda shek joq. Prezıdenttiń ózi quttyqtaý hatyn joldap jatsa, nege qýanbasqa! Balam Qazaqstan Respýblıkasynyń baqytty balalarynyń bir bolyp ósedi dep senemin! Ómirge alǵashqy kelgen kúnnen qurmetke ıe bolyp jatyr... Elimizde analar da, balalar da baqytty bolsyn!» - deıdi Almaty qalasynyń turǵyny Eskeldınova Gúlfıa Edilhanqyzy.
Aıta ketý kerek, «Súıinshi» syıqoraptaryn QR Sıfrlyq damý, ınovasıalar jáne aeroǵarysh mınıstrligi «Azamattarǵa arnalǵan úkimetpen birge jáne QR Ulttyq bank, Sentrkredıt banki jáne «Qazposhta» AQ qatysýymen uıymdastyrdy.