Jańa oqý jylyna ázirlik
Jańa oqý jyly áne-mine degenshe aıańdap kelip te qaldy. JOO men kolejder stýdentterge esigin ashyp, dástúrli formatta bilim beretindigin jarıalady. Karantın talaptaryna baılanysty oqytýshylar men stýdetterdiń ekpe salýlary mindet ekendigin, oqý barysynda saqtyq sharalaryn qatań qadaǵalap, maskalyq rejımdi saqtaýlary qajet ekendigin atap ótti. Stýdenttermen tezirek qaýyshyp, olarǵa qaýipsizdikti qamtamasyz etý úshin ekpe salǵyzýǵa asyqan Tóleýǵalı Taıtóleev byltyr koronavırýspen aýyrǵan. "Mundaı qıyndyqty eshkimniń basyna bermesin", - deıdi oqytýshy.
«Meniń tanystarym qaıtys boldy, týystarym qaıtys boldy. Kóp adam o dúnıege ketip jatyr. Aıtaıyn degenim, solardyń barlyǵy da ekpe almaǵandar. Almasa, bolmaıdy. Sebebi buryn da alyp júrdik qoı ekpeni bala kezimizden», – dedi Almaty memlekettik energetıka jáne elektrondy tehnologıalar kolejiniń dırektory Tóleýǵalı Taıtóleev.
El arasyndaǵy túrli alyp-qashpa áńgimeler ekpe egý qarqynyna kedergi keltirip turǵany jasyryn emes. Alaıda mamandar dúnıe júzi boıynsha 2 mıllıardtan astam adam ekpe alǵan bolsa, demek, vaksınanyń tıimdiligi joǵary degen pikir bildirdi.
«Bizge osy pandemıa jaǵdaıynda ómir súrýdi úırený kerek. Vaksına koronavırýs juqtyrýdan 100 paıyz qorǵamasa da, aýrýdy aýyr ótkerýden jáne ólimnen qorǵaıdy dep senimdi túrde aıta alamyn. Al, vırýs mýtasıaǵa ushyraǵandyqtan, ekpe tıimsiz bolyp qaldy degen jaı ǵana qaýeset. Vaksınanyń ár túri ábden zerttelgen ári tıimdiligin dáleldegen», – dedi Qazaq reprodýktıvti medısına asosıasıasynyń prezıdenti Vácheslav Lokshın
Jańa oqý jyly qarsańynda stýdentterdi qabyldaýǵa daıyndyqtyń eń mańyzdy bóligi – ujymdaǵylardyń jappaı ekpe alýy, - dedi Qazaq ulttyq medısına ýnıversıtetiniń qyzmetkeri. Mundaǵy qyzmetkerler men stýdentterdiń 90 paıyzy vaksına salǵyzypty.
«Koronavırýs ınfeksıasynyń aldyn alý boıynsha jalǵyz jol – vaksına alý. Óıtkeni qoǵamdyq ımýnıtet qalyptastyrý úshin ekpe alý kerek. Men ózim vaksına aldym. Aldymen mamandarmen sóılesip, tolyq zerttedim», – dedi S.Asfendıarov atyndaǵy QAZUMÝ jastar saıasaty basqarmasynyń bas mamany Rymkesh Jarmaǵanbet.
Aıta ketý kerek, egý naýqany bastalǵaly qala boıynsha 853 myń 5 adam ekpeniń 1-komponentin alsa, 699 myń 67 adam vaksınanyń 2 komponentin de salǵyzǵan. Onyń 110 myń 236-sy - alpysty alqymdaǵandar.