Memleket basshysy beınebaılanys arqyly Jambyl oblysynda jel generatorlaryna arnalǵan qosalqy bólshekter shyǵaratyn zaýyttyń ashylý saltanatyna qatysty, dep habarlaıdy aqshamnews.kz
Prezıdent Qasym-Jomart Toqaev Qytaıdaǵy resmı sapary aıasynda QHR Memlekettik keńesiniń birinshi vıse-premeri Dın Súesánmen birge beınebaılanys arqyly Jambyl oblysynda jel generatorlaryna arnalǵan qosalqy bólshekter shyǵaratyn zaýyttyń alǵashqy keshenin saltanatty túrde iske qosty.
Atalǵan joba – «Samuryq-Qazyna» ulttyq ál-aýqat qory men SANY Renewable Energy kompanıasynyń tabysty seriktestiginiń nátıjesi. Bul jel energetıkasyna arnalǵan qondyrǵylar shyǵaratyn álemdegi eń iri kompanıanyń elimizde ashqan birinshi kásiporny.
Óndiristik baza Shý qalasyndaǵy «Jibek joly» arnaıy ekonomıkalyq aımaǵynda ornalasqan. Kásiporyn gondola, kúpshek, munara sıaqty jel elektr stansasyna qajet bólshekterdi shyǵarady. Jobany júzege asyrý elimizdegi jańa elektr stansalarynyń qurylysyn qamtamasyz etip, «jasyl» energetıkanyń damýyna zor úles qosady.