Qazaq óneriniń altyn ordasy – Jambyl atyndaǵy Qazaq memlekettik akademıalyq fılarmonıasy bıyl óziniń 90 jyldyq mereıtoıyn atap ótýde, dep habarlaıdy aqshamnews.kz
1935 jyly 14 qańtarda Qazaq KSR Halyq Komısarlar Keńesiniń qaýlysymen qurylǵan bul óner ordasy 1938 jyly jyr alyby Jambyldyń esimin ıelendi. 2023 jyly Qazaqstan Respýblıkasynyń Úkimetiniń qaýlysymen «Akademıalyq» mártebe berilip, ujymnyń shyǵarmashylyq deńgeıi joǵary baǵalandy.
Fılarmonıanyń negizin qalaýshy – kórnekti mýzykatanýshy, kompozıtor, dırıjer, Qazaq KSR-niń halyq ártisi Ahmet Jubanov. Ár jyldary bul mekemede qazaq mýzykasy men óneriniń uly tulǵalary qyzmet etti. Olardyń qatarynda Dına Nurpeıisova, Ámire Qashaýbaev, Qalı Jantileýov, Kúlásh Baıseıitova, Roza Baǵlanova, Júsipbek Elebekov, Bıbigúl Tólegenova syndy ańyz adamdar bar.
Fılarmonıanyń shyǵarmashylyq ujymdary – T.Ábdirashev atyndaǵy QR Memlekettik akademıalyq sımfonıalyq orkestri, N.Tilendıev atyndaǵy akademıalyq fólklorly-etnografıalyq «Otyrar sazy» orkestri, Memlekettik úrmeli aspaptar orkestri, Memlekettik hor kapelasy, ishekti aspaptar kvarteti, klasıkalyq gıtarıster kvınteti jáne basqa da óner ujymdary – qazaq jáne álemdik klasıkalyq mýzykaǵa úlken úles qosyp keledi.
Repertýarynda 20 000-nan astam týyndysy bar fılarmonıa ujymy 90 jyl boıy qazaq óneriniń rýhyn asqaqtatyp keledi. Qasıetti ónerdiń qara shańyraǵy mereıtoı qarsańynda jyl kóleminde birqatar is-sharalar ótkizýdi jáne qarasha aıynda gala-konsert uıymdastyrýdy josparlap otyr.
Almaty qalasynyń talǵampaz kórermenderin óner keshterine shaqyramyz.