Almatyda Qalalyq josparlaý jáne ýrbanıstıka basqarmasynda Naýryz merekesi dástúrli túrde konserttik baǵdarlamamen atalyp ótti.
Kóktemniń shýaqty merekesi Naýryz meıramynyń qarsańynda basqarma qyzmetkerleri kúndelikti keńse kıimderin ulttyq kıimderge aýystyryp Almatylyqtar men áriptesterin jyly júzben jáne «Parasat» jas dombyrashylar ansambliniń qatysýymen uıymdastyrylǵan merekelik baǵdarlamamen qarsy aldy. Kúıshilerdiń oryndaýynda halyq áýenderi, onyń ishinde ataqty kúıler oınaldy, dep habarlaıdy almaty-akshamy.kz.
«Naýryznama» jospary aıasynda ótken sharada jastardan quralǵan dombyrashylar jınalyp, qazaq kúılerin oryndady. «Adaı», «Erke sylqym», «Balbyraýyn» sıaqty tanymal týyndylar shertildi.
«Naýryz meıramy beıbitshilik pen izgilikti, jańa ómirdi, tabıǵattyń oıanýyn, rýhanı órleýdi beıneleıdi. Ejelden naýryz meıramy zaman men urpaqtar arasyndaǵy dostyqty, ózara syılastyqty jáne úzdiksiz baılanysty nyǵaıtýǵa yqpalyn tıgizetin jaryq kún retinde qasterlenip keledi», -deıdi basqarma basshysynyń orynbasary Erkebulan Sembaev.
Keń dalany meken etken qazaq jurtynyń eń aıaýly da qasıetti mýzykalyq aspaby dombyranyń birde kúmbirlegen, birde shertilgen oıly dybysy qulaqqa jaǵymdy, júrekke jaqyn estildi. Onyń kúmisteı syńǵyrlaǵan úni talaı syrdyń basyn qaıyrdy.
Eske sala keteıik, bıyl áz-Naýryz merekesi jyldaǵydan erekshe ótýde. Bir qýanarlyǵy, mundaı sharalar keleshek urpaqty ulttyq qundylyqtarymyzdy qadirleýge tárbıeleıdi. Endeshe atadan-balaǵa mura bolyp kele jatqan ulttyq qundylyqtarymyzdy áli de jandandyryp, mártebesin asyra berýimiz kerek.