Brakonerlerden nómirsiz qarý tárkilendi
İle-Alataýy Memlekettik ulttyq tabıǵı parkiniń qyzmetkerleri Sibir eligin atqan brakonerlerdi ustady, dep habarlaıdy Almaty-akshamy.kz QR EGTRM Orman sharýashylyǵy jáne janýarlar dúnıesi komıtetiniń baspasóz qyzmetine silteme jasap.
«2022 jyldyń 28 qańtarynda «İle-Alataýy MUTP» RMM Túrgen fılıalynyń ınspektorlary saǵat 14:00 shamasynda Sibir eligin (atalyq) atqan úsh brakonerdi ustady. Túrgen fılıalynyń ınspektorlary E.Jylsbaev, K. Qumarbekov, Á. Serikjan, M. Baıtasov Esik ormanshylyǵynyń №9 oram aýmaǵyn barlaý barysynda Sibir eligin bólshektep jatqan brakonerlerdiń ústinen túsken. Nátıjesinde zańsyz ań atqan Qazaqstan Respýblıkasynyń úsh azamaty ustaldy»,-delingen habarlamada.
Inspektorlardyń aıtýynsha, oqıǵa ornynda Sibir eliginiń bólshektelgen eti, basy, terisi jáne ishek-qaryny jatqan.
«Ustaý kezinde quqyq buzýshylardan kalıbri 7,62 Vepr-308 markaly (nómiri SA9615) myltyǵy jáne nómirsiz, qaıta jasalǵan eki qarý tárkilendi. Quqyq buzýshylar Almaty oblysy Eńbekshiqazaq aýdanynyń polısıa bólimine jetkizildi. Qazir sotqa deıingi tergep-tekserý amaldary júrgizilip jatyr»,-delingen habarlamada.
Esterińizge sala keteıik, atalǵan quqyq buzýshylyq úshin qylmystyq jaýapkershilik qarastyrylǵan. «Erekshe qorǵalatyn tabıǵı aýmaqtar týraly» QR Zańyna sáıkes erekshe qorǵalatyn tabıǵı aýmaqtarda ań aýlaýǵa tyıym salynǵan.