Almaty oblysynda óńirdiń úzdik sportshylaryna «Han Táńiri» syılyǵy tabystaldy.
Saltanatty sharada sport salasyna eńbek etip júrgen mamandar «Dene shynyqtyrý jáne sportty damytýǵa qosqan úlesi úshin» tósbelgilerimen, Qazaqstan Respýblıkasynyń týrızm jáne sport Mınıstrliginiń jáne Almaty oblysy Ákiminiń Qurmet gramotalarymen marapattaldy. Sonymen qatar aqshalaı syıaqy berildi, dep habarlaıdy almaty-akshamy.kz.
Osymen ekinshi ret ótip otyrǵan úzdik sportshylardy marapattaý rásimine oblystaǵy sport salasynyń barlyq ókilderi qatysty. Saltanatty sharada sóz alǵan óńir basshysy keler jyly sportshylarǵa beriletin syıaqy eki esege artatyn jetkizdi.
Marat Sultanǵazıev, Almaty oblysynyń ákimi:
Almaty oblysynyń sportshylary úshin de tabysty jyl boldy dep esepteımiz. Bıyl sportshylarymyz halyqaralyq jáne respýblıkalyq deńgeıdegi jarystarda 1800-den asa medal ıelendi. 146-y álem chempıonattarynda, al 119-y Azıa chempıonattarynda.
Saltanatty jıynda Almaty oblysynyń dene shynyqtyrý jáne sport salasynyń úzdik 130 ókili marapattaldy. Olardyń arasynda halyqaralyq jarystarda el mereıin asqaqtatyp júrgen sportshylar da bar.
Tolǵanaı Qasymbek, bokstan álem chempıony:
Múmkin emes nárse joq. Tek tabandylyq pen qaısarlyqtyń arqasynda barlyǵyna jetýge bolady. Tártip pen dısıplınaǵa úırený kerek. Osylardyń barlyǵy boıyńyzda bolsa jeńiske jetpeý múmkin emes.
Erbolat Sarabekov, oblystyq dene shynyqtyrý jáne sport basqarmasynyń basshysy:
Aıta ketý kerek, jazda ótken Azıa oıyndarynda Almaty oblysy eki altyn, úsh qola medal jeńip aldy. Qazaqstan Respýblıkasy boıynsha úshinshi orynǵa turaqtady.
Jyl basynan beri Almaty oblysynyń sportshylary respýblıkalyq jáne halyqaralyq jarystarda 1806 medal ıelendi. Endigi meje - keler jyly ótetin Olımpıada oıyndarynda jaqsy nátıje kórsetý.