Qazaqstan Prezıdenti Astana halyqaralyq forýmynda ekologıa máselesin kóterdi.
Memleket basshysy halyqaralyq Araldy qorǵaý qoryn qoldaýǵa kóbirek qarjy bólýge shaqyrdy, dep habarlaıdy Almaty-akshamy.kz.
«Aımaqtaǵy eki úlken ózen Syrdarıa men Ámýdarıadaǵy sý deńgeıi 2050 jylǵa qaraı 15 paıyzǵa túsedi. Biz aımaqtaǵy ekologıalyq apattyń aldyn alý úshin Halyqaralyq Araldy qorǵaý qoryn qoldaýǵa kóbirek qarjy bólýge shaqyramyz. Sý men klımattyń ózgerý máselesi ózara tyǵyz baılanysty. Ortalyq Azıa – sý qaýipsizdigin saqtaý tyǵyz áriptestik jáne birlesken tıimdi sharalardy júzege asyrý arqyly ǵana sheshiletin aımaq. Aımaqtaǵy klımat jáne ózge de máselelerdi talqylaý úshin men Almatyda Ortalyq Azıa elderiniń jobalyq keńsesin qurýdy jáne BUU sekildi halyqaralyq uıymdardy tarta otyryp, 2026 jyly Qazaqstanda Aımaqtyq klımattyq samıt ótkizýdi usynamyn», - dedi Qasym-Jomart Toqaev.
Sonymen qatar Memleket basshysy «jasyl» ekonomıkaǵa qajetti jyldamdyqpen kóshý úshin tıisti resýrstar kerek ekenin aıtty
«Elimiz «jasyl» ekonomıkanyń mol múmkindikterin usynyp, qaıta qalpyna keltiriletin energetıkanyń ortalyǵy atana alar edi. Alaıda ýaqyt bizdiń jaǵymyzda emes. Kómirdi az tutyný jáne «jasyl» ekonomıkaǵa qajetti jyldamdyqpen kóshý úshin bizge resýrstar men seriktestik baılanys qajet», - dedi Prezıdent.
Budan buryn habarlanǵandaı, búgin elordadaǵy Kongres ortalyqta Astana halyqaralyq forýmy jumysyn bastady.
Forým klımattyń ózgerýine, azyq-túlik tapshylyǵyna jáne energetıkalyq qaýipsizdikke qatysty máselelerdi sheshý joldaryn qarastyrý maqsatynda shetel úkimetteriniń, halyqaralyq uıymdardyń, bıznes pen ǵylymı ortanyń joǵary laýazymdy delegattarynyń dıalogine arnalǵan alań bolmaq.