Kelisimge bank basshylary qol qoıdy.
2022 jylǵy 13 sáýirden bastap kredıtteri Halyk Bank-ke berilgen klıentter óz nesıesiniń statýsyn JSN arqyly banktiń saıtynan teksere alady, dep habarlaıdy Almaty-akshamy.kz.
Kredıtteri Halyk Bank-ke aýysqan klıentter úshin eshteńe ózgermeıdi.
Kelisimshart boıynsha Halyk Bank «Sberbank» AQ enshiles banki klıentteriniń kredıttik portfeliniń bir bóligin satyp aldy.
Mámile Qazaqstan damý bankiniń jeńildetilgen nesıeleý baǵdarlamasy boıynsha rásimdelgen avtokredıtterdi, kepilsiz kredıtterdiń bir bóligin, shuǵyl qajettilikke berilgen qaryzdar men ıpotekalyq kredıtterdi qamtydy. Halyk Bank-ke tapsyrylǵan kredıtter boıynsha negizgi boryshtyń jalpy mólsheri 330 mlrd teńgeni quraıdy.
Al 1 sáýirdegi jaǵdaı boıynsha «Sberbank» AQ enshiles bankiniń tutynýshylyq qaryzdarynyń kredıttik portfeli 1,1 trln teńge bolǵan.
«Sberbank» AQ enshiles bankiniń basqarma tóraǵasy Eldar Teńizbaev nesıelerdi tabystaý jalpyǵa ortaq praktıka jáne bank sektorynda qalypty prosedýra ekenin atap ótti.
«Biz árdaıym klıentter aldynda da, memleket aldynda da óz mindetterimizdi oryndaýǵa tyrysamyz. Búgingi kúni Sberbank Qazaqstan memlekettiń barlyq aqshasyn, sonyń ishinde jeńildetilgen nesıeleý baǵdarlamasy boıynsha berilgen qarajatty qaıtardy. Kredıttik portfeldiń bir bóligin berý – qarjy salasynda taralǵan praktıka. Klıentter eshqandaı aýyrtpalyqsyz basqa bankke aýysady. Bizdiń seriktesimiz úshin bul – qaryz portfelin ulǵaıtý múmkindigi. Al bizge bul kelisim klıentterimizdiń qajettiligin qamtamasyz etýge qajetti qosymsha ótimdilik beredi», - dedi Eldar Teńizbaev.